Ministru Asuntu Parlamentár no Komunikasaun Sosiál, Francisco Jerónimo. Imajen Tatoli/Egas Cristovão

DILI, 11 novembru 2020 (TATOLI)–Ministru Asuntu Parlamentár no Komunikasaun Sosiál (MAPKOMS), Francisco Jerónimo, konvoka enkotru ho diresaun sira hotu hodi ko’alia kona-ba programa prioridade no ezekusaun Orsamentu Jerál Estadu (OJE) tinan fiskál 2020.

Nia haktuir, durante enkontru ho diretór sira, inklui instituisaun tutela, konsege haree filafali ezekusaun efetivu OJE 2020 ho durasaun fulan-rua de’it no oras ne’e hela de’it loron balun.

“Ita iha loron balun de’it atu kompleta ezekusaun orsamentu 2020 nian,” Ministru Francisco informa, iha kuarta ne’e, hafoin enkotru iha Palásiu Governu.

Governante nee’e esplika, programa prioridade MAPKOMS mak atividade ne’ebé planeia ona iha 2020, liuliu atu kompleta programa sira, ezemplu hanesan Sentru Formasaun Téknika iha Komunikasaun (CEFTEC, sígla Portugés) atu kompleta formasaun ba jornalista lian portugés no mós serbisu ne’ebé iha relasaun ho ofisiál média sira.

Kona-ba diresaun sira seluk hanesan Diresaun Nasionál Deseminasaun Informsaun (DNDI) sei buka kompleta serbisu sira ne’ebé mak iha relasaun ho Governu ko’alia no seluk tan.

“Ami deside hotu katak bainhira kompleta iha fulan-dezembru, ezekusaun 90% resin tanba programadu no he’in de’it ezekusaun,” nia subliña.

Alokasaun orsamentu ba MAPKOMS hamutuk millaun $3,131, kompostu husi saláriu no vensimentu $675.000, bens no serbisu $842.000, transferénsia públika 1,614.

Ekuantu orsamentu ba Sekretaria Estadu Komunikasaun Sosiál (SEKOMS) hamutuk millaun 1,237, kompostu hosi saláriu no vensimentu $209.000, bens no servisu $851.000, no transferénsia públika $177.000.

Proposta OJE 2020 aprovadu iha Parlamentu Nasionál iha loron 08 outubru 2020 hamutuk biliaun $1,497, fahe ba kategoria saláriu no vensimentu millaun $206,8, bens no servisu milliaun $496,7, transferénsia públika millaun $571,1, kapitál menór millaun $8,9, kapitál dezenvolvimentu millaun $213,4. 

Ho aprovasaun ne’e hakotu rejime duodesimál ne’ebé Governu hahú funsiona iha janeiru to’o outubru 2020 no ezekusaun orsamentu sei efetivu iha novembru no dezembru.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here