Xefe Estadu Maiór Jenerál F-FDTL, Majór Jenerál Lere Anan Timur. Imajen Tatoli/Antonio Goncalves

DILI, 11 novembru 2020 (TATOLI)- Xefe Estadu Maiór Jenerál FALINTIL-Forsa Defeza Timor–Leste (F-FDTL), Majór Jenerál Lere Anan Timur, afirma seidauk iha kondisaun atu bele estabelese polítika militár obrigatóriu.

Notísia Relevante : Paixão Konkorda Militár Obrigatóriu Maibé Harii ho Padraun

Tuir Majór Jenerál Lere katak, dekretu governu kona-ba rekrutamentu militár obrigatóriu ne’ebé aprezenta hosi Ministru Defeza, Filomeno da Paixão de Jesus, hanesan planu ida hosi programa 2020 nian. Nune’e, tuir Majór Jenerál Lere nia haree katak, molok implementa polítika militár obrigatóriu presiza kria kondisaun hanesan, hadi’a infraestrutura, lojístika no bein star membru F-FDTL sira nian.

“Servisu obrigatóriu militár governu deside ona, ha’u labele kontraria, ha’u obedese governu nian desizaun ba lei servisu militár obrigatóriu, mais ninia implementasaun maka dala ruma seidauk to’o tempu karik,” Lere afirma hodi hatán ba jornalista sira, ohin, iha Palásiu Prezidensiál, Dili.

Lere dehan iha kadernu planu estratéjiku 2020 ne’e dehan, to’o tinan 2020 F-FDTL tenke atinje ona númeru forsa autorizadu 3,600. Maibé, iha estudu foun ne’ebé Gabinete 2020 halo, númeru efetivu la’ós 3,600 de’it, maibé 4,000 to’o 5,000 tuir nesesidade forsa armada nian.

Nia hatutan, daudaun ne’e Governu estabelese tan, Autoridade Marítima Nasionál (AMN) tenke investe rekursu barak hanesan mós investe ba forsa Aero, Naval, no Forsa Terrestre nian.

Lere agradese ho inisiativa Governu kria lei militár obrigatóriu ne’ebé hatudu vantajen no dezvantajen.

Vantajen hosi dekretu Governu ne’e, tuir Lere, halo Timoroan hotu- hotu tenke iha nosaun ba espíritu nasionalizmu no patriotizmu defende maka’as soberania nasaun no dixiplina maka’as. Maibé  dezvantajen, joven tinan-18 ne’e idade atu eskola, maibé bainhira sira la tama militár, sira bele selu taxa militár ninia.

“Se joven ne’e idade tinan-18 nia tenke eskola, se nia la ba militár nia tenke selu taxa militár, ida ne’e maka problema, tanba nia tenke selu osan eskola no selu mós taxa militár, maibé inan-aman bele ka lae,” Lere preokupa.

Nia hatutan, atu implementa polítika hirak ne’e, importante liu maka nasaun ne’e labele hasoru beibeik impase polítika hodi labele afeta ba polítika dezenvolve F-FDTL.

Lei obrigatóriu militár mós define klaru bainhira joven ida tama ona militár to’o tinan hirak maka nia bele sai ba vida militár no bainhira ida atu kontinua sai militár presiza kria kondisaun moris atu kontribui buat di’ak ba instituisaun.

Komandu F-FDTL mós agradese, iha polítika 2020 konsege realiza mehi F-FDTL nian hodi hala’o no kontribui ba misaun paz iha ONU nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here