Xefe Estadu Maiór F-FDTL, Majór Jenerál Lere Anan Timur. Imajen Tatoli/Antonio Goncalves

DILI, 11 novembru 2020 (TATOLI)- Xefe Estadu Maiór Jenerál FALINTIL-Forsa Defeza TimorLeste (F-FDTL), Majór Jenerál Lere Anan Timur, ohin, aprezenta programa ezersísiu “Cobra20-2” F-FDTL nian ba Prezidente Repúblika, Francisco Guterres “Lú Olo” iha Palásiu Prezidensiál, Dili.

Notísia Relevante : Ezersísiu Cobra20-2 fó apoiu foos saka 400 ba komunidade suku 10

Atividade ezersísiu “Cobra20-2 ne’ebé konsentra iha Suku Nunira, Postu Administrativu Laga, Munisípiu Baucau, halo mós asaun solidariedade, hanesan apoia ai-han, konsulta médiku jerál, diálogu no juramentu ba membru Organizasaun Arte Marsiál (GAM) Persaudaraan Setia Hati Terate (PSHT), Kmanek Oan Rai Klaran (KORK) no membru Ikatan Keluagra Silat (IKS) Kera Sakti.

Membru arte marsiál sira ne’e halo juramentu iha bandeira RDTL, Bandeira FALINTIL, foho-lulik, bee-lulik no ba Maromak, hodi promete haribit sala no badame-malu hafoin mosu konfrontasaun  fíziku entre parte sira ne’ebé rezulta uma komunidade nian hetan sunu no sunu mós motor ida.

“Ha’u informa atividade forsa armada nian kona-ba ezersísiu Cobra20-2 halo iha área Laga atu kapasita komandante no soldadu sira, ami apoia mós ita nia komunidade no halo dame mós ba membru arte marsiál sira iha área Laga no Baguia ninian liu-liu iha Nunira, Samalari, Sagadate, Lavateri (Baguia) entre PSHT, KORK no Kera Sakti,”  hateten Lere ba jornalista hafoin enkontru ho PR Lú Olo.

Majór Jenerál  Lere  espera prosesu juramentu ne’ebé membru GAM tolu halo iha Komandu F-FFDTL no KRAM nia oin bele dura hodi fó moris kmatek ba povu sira.

Notísia Relevante : Ezersísiu “Cobra20-2” ho KRAM sei hadame membru GAM iha Nunira

Nia hatutan, ezersísiu ne’e tuir planu sei halo tan iha munisípiu sira seluk ho programa hanesan, tanba ne’e, parte F-FDTL sei haree kona-ba preparasaun lojístika no orsamentu hodi apoiu programa hirak ne’e.

Aprezenta programa ne’e hetan reasaun pozitivu hosi Xefe Estadu Lú Olo hodi alerta ba Komandu F-FDTL kontrola nafatin membru sira servisu ho dixiplina no neutralidade hodi fó susesu ba membru sira ho instituisaun F-FDTL.

Majór Jenerál Lere no Xefe Estadu preokupa mós kazu krime omisídiu ne’ebé akontese iha territóriu Timor-Leste presiza hetan atensaun maka’as hosi setór judisiáriu sira hodi rezolve kazu hirak ne’e tuir lei.

“Ita nia tribunál sira maka tenke servisu maka’as reforsa lei sira ne’e atu labele akontese beibeik krime,” Lere hateten hodi afirma tan, mezmu mosu kazu krime omisídiu sira, maibé situasaun seguransa iha territóriu Timor-Leste la’o kontroladu nafatin.

Notísia Relevante : Ezersísiu “Cobra20-2” hala’o tratamentu saúde ba komunidade postu tolu

 Jornalista  : Eugénio Pereira

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here