PNTL feminina partisipa iha kursu Kombate Krime Violasaun no Abuzu Seksuál Ba Menór hodi Mellora Servisu Investigasaun iha Sentru Formasaun Polísia, Comoro-Dili. Imajen/PNTL

DILI, 11 novembru 2020 (TATOLI)-Komandu Jerál Polísia Nasionál Timor-Leste (PNTL) liuhosi Sentru Formasaun Polísia (CFP) fasilita kursu Kombate Krime Violasaun no Abuzu Seksuál Ba Menór  ba polísia feminina sira hodi mellora servisu investigasaun.

PNTL feminina partisipa iha kursu Kombate Krime Violasaun no Abuzu Seksuál Ba Menór hodi Mellora Servisu Investigasaun iha Sentru Formasaun Polísia, Comoro-Dili. Imajen/PNTL

Iha serimonia abertura kursu-ne’e, Komandante Jerál Polísia Nasional Timor-Leste (PNTL), Komisáriu Faustino da Costa, hateten kursu-ne’e hanesan oportunidade di’ak ida atu kontinua kursu ba dala-rua área VPU ninian no oportunu ba dahuluk maka ba área jestaun lideransa ne’ebé foku liu-liu ba PNTL feminina sira.

“Iha oportunidade ida-ne’e Komandu Jerál PNTL hakarak hato’o ba ita hotu iha ne’e katak PNTL dezde tinan 2019 ita iha ona Planu Estratéjiku tinan -lima ba área jéneru ninian, ne’ebé parte ida ohin kursu ne’ebé ita halo nu’udar atividade ba implementasaun ba planu estratéjiku ida ne’e,”  Komisáriu Faustino hateten liuhosi karta komunikadu imprensa ne’ebé Agência Tatoli asesu, ohin.

Iha planu estratéjiku PNTL ba tinan-lima ne’e maka mai mós hosi suporta ka apoiu programa ONU nian ida parseiru sira hotu tau iha ne’ebá maka spotlight parte ida suporta tebes-tebes hosi UNDP tantu mós hosi embaixada Austrália no TLPDP.

“Aproveita kursu ida-ne’e no hatudu rezultadu bainhira sira remata kursu ida-ne’e hodi halo imi nia servisu iha idak-idak nia munisípiu, unidade no departamentu sira tanba sertifikadu ne’ebé imi simu hafoin kursu ne’e laiha valór bainhira imi la hatudu ka implementa iha knaar loron-loron nian,” Komisáriu Faustino hateten.

Iha fatin hanesan Komandante Sentru Formasaun Polísia (CFP), Superintendente Xefe, Arquimino Ramos, hateten, kursu rua hanesan jestaun lideransa ba feminina PNTL sira no kursu ida maka asaltu seksuál ba VPU sira ne’ebé PNTL hala’o dala ida iha semana oin.

Tuir ajenda kursu jestaun lideransa sei kontinua to’o tinan oin hodi bele aumenta rekursu membru PNTL hotu-hotu.

“Iha balun ne’ebé área formasaun ninian inklui mós kapasitasaun ba feminina PNTL sira tanba dala-barak feminina PNTL sira ezije partisipasaun feto nian iha lideransa PNTL, konferénsia ka semináriu ne’ebé feto sira organiza sempre ezije ida ne’e, dezde tinan uluk to’o agora, ida ne’e maka oportunidade ne’ebé komandu jerál ho ita nia parseiru TLPDP, ita buka ona dalan atu bele kapasita feto sira, atu bele sai lider PNTL ne’ebé di’ak agora no ba futuru,” nia hateten.

Kursu ne’e partisipa hosi Xefe Investigasaun Vulnerable Person’s Unit (VPU) hosi Komandu Munisípiu 13 no Kursu Jestaun Lideransa Ba feto PNTL ne’ebé partisipa husi Polísia feminina sira hosi Kuartél Jerál PNTL.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here