Ekipa jogadora Tatoli.IP (tuur) no ekipa MOP (hamrik). Imajen Tatoli/Hortencio Sanches

DILI, 11 novembru 2020 (TATOLI) –Jogu kontinuasaun torneiu futeból salaun (fustsal), ohin loraik, iha kampu multifunsaun Bebora, Dili, ekipa feminina Agência TATOLI.IP konsege manan nia adversáriu hosi Ministériu Obras Públiku (MOP)  ho golu úniku  1-0 ne’ebé prodús hosi jogadora Maria Auxiliadora (7).

Notísia Relevante : Torneiu Futsal MAPKOMS, TATOLI vs Telemor 3-0

Hanesan baibain minutu primeira parte rua lansa kedan kontra ho atake ba malu, maibé la rezulta golu ruma tanba forsa hosi ekipa rua kuaze hanesan. Jogadora TATOLI, Maria Auxiliadora no Celestina Menezes (10) hetan oportunidade barak, maibé oportunidade hirak ne’e hela de’it hanesan oportunidade tanba la konsege hatama golu ruma to’o minutu primeira parte termina.

Haku’ur  ba segunda parte jogu manas liután no atu besik ba to’o jogu nia rohan, jogadora TATOLI, Maria Auxiliadora, aproveita kedas oportunidade lansa pasa bola  ida ba nia hodi fura kedas baliza MOP nian.

To’o árbitru huu apitu naruk hodi termina jogu torneiu Ministériu Asuntu Parlamentár no Komunikasaun Sosiál (MAPKOMS) ne’ebé asiste mós hosi Ministru Obras Publika (MOP), Salvador Soares dos Reis Pires ne’e, vitória monu ba TATOLI 1-0 ba MOP.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here