Deputada Maria Angelina Lopez Sarmento. Imajen Tatoli/Egas Cristóvão

DILI, 11 novembru 2020 (TATOLI)—Bankada Partidu Libertasaun Populár (PLP) preokupa ho montante orsamentu millaun $41.588 ne’ebé prevee iha Fundu Infraestrutura hodi kompra de’it ekipamentu komputadór iha proposta-lei Orsamentu Jerál (OJE) tinan fiskál 2021.

Deputada Maria Angelina Lopes Sarmento, haktuir durante hala’o kontaktu eleitorál iha baze, povu nia nesesidade prioritáriu liu mak água no saneamentu maibé iha área refere Governu tau de’it millaun $3.449.

“Maibé iha livru panorama orsamentál prevee kedas millaun $41.588 hodi kompra ekipamentu komputadór, durante ami halo kontaktu eleitorál povu nia nesesidade liu mak água no saneamentu,” Deputada PLP ne’e levanta liuhosi plenária iha ámbitu audiénsia públika ho Ministériu Obra Públika (MOP), Ministériu Planeamentu no Ordenamentu (MOP) no Ministériu Transporte no Komunikasaun (MTK), iha Parlamentu Nasionál, kuarta ne’e.

Purtantu Governu prevee Fundu Infraestrutura (FI) ba tinan fiskál 2021 ho montante millaun $339.605 ne’e kompostu hosi rihun $32 ba saláriu vensimentu, millaun $1.040 ba bens (sasán) servisu no millaun $338.533 ba kapitál dezenvolvimentu.

Hosi Fundu Infraestrutura ne’e mós prevee rihun $60 ba boa governasaun no jestaun institusionál, setór agrikultura millaun $3.798, água no saneamentu millaun $3.449 de’it, dezenvolvimentu urbanu no rurál millaun $6.190, edifísiu públiku millaun $7.693, edifísiu edukasaun millaun $4.843, enérjia elétrika millaun $18.321.

Deputada Maria Angelina kestiona tanba VIII Governu prevee millaun $41.588 atu kompra ekipamentu komputadór.

Iha Fundu Infraestrurura ne’e mós prevee millaun $4.844 iha saúde, seguransa no defeza millaun $13.884.

Deputada Bankada PLP ne’e husu Prezidente Konsellu Administrasaun Fundu Infraestrutura (KAFI) no Vise-Primeiru mINISTR, José Reis atu argumenta razaun ne’ebé halo governu prioritiza liu sosa ekipamentu komputadór iha OJE 2021.

Hosi fundu infraestrutra ne’e mós prevee ba solidariedade sosiál millaun $1.000, projetu tasi mane millaun $8.500, aeroportu millaun $19.843, preparasaun dezeñu no supervizaun ba projetu foun millaun $9.441, estrada millaun $105.215, ponte millaun $4.896, portu millaun $1.814, programa ba setór turizmu rihun $ 652, programa empréstimu millaun $70.700, programa setór finansa millaun $2.905, Sekretariadu Estadu Juventude no Desportu millaun $2.034, Komisaun Administrasaun Fundu Infraestrutura (KAFI) millaun $1.011, programa manutensaun no reabilitasaun millaun $6.924.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here