Ministériu Interiór, Embaixada Japaun no UN Women, ohin, iha Dili komemora tinan 20 “Feto, Paz no Seguransa” iha Timor-Leste. Imajen/Embaixada Japaun

DILI, 10 novembru 2020 (TATOLI)-Ministériu Interiór, Embaixada Japaun no UN Women, ohin, iha Dili komemora tinan-20 “Feto, Paz no Seguransa” iha Timor-Leste ka komemorasaun ba tinan-20 hosi Rezolusaun Konsellu Seguransa ONU ba Feto, Paz no Seguransa.

UN Women kolabora ho Ministériu Interiór, ho fundu Jenerozu hosi Governu Japaun hodi revé progresu ba Planu Asaun Nasionál ba Rezolusaun Konsellu Seguransa ONU 1325 no rezultadu hosi parseria 2016-2020 ba Feto, Paz no Seguransa.

Iha komemorasaun ba tinan 20 hosi Rezolusaun Konsellu Seguransa ONU 1325 (2000) ba feto, paz no seguransa, Timor-Leste halo reflesaun ba nia progresu rasik atu avansa nia Planu Asaun Nasionál ba Rezolusaun Konsellu Seguransa ONU 1325 (PAN 1325) 2016-2020.

Lidera hosi Ministériu Interiór iha koordenasaun ho liña ministériu oi-oin, instituisaun Estadu no sosiedade sivíl, PAN implementa ona ho asisténsia téknika hosi UN Women no suporta jenerozu hosi Governu Japaun.

Iha tinan 2020, Timor-Leste no Japaun hanesan nasaun ida hosi membru ONU 85 ne’ebé dezenvolve tiha ona Planu Asaun Nasional ida ba Rezolusaun Konsellu Seguransa ONU 1325. PAN 1325 Timor nian suporta atividade sira atu promove no garantia feto sira nia partisipasaun iha pozisaun no prosesu ba foti no halo desizaun sira, inklui setór defeza no seguransa, harii paz no dezenvolvimentu.

Dezde adoptasaun PAN 1325 iha 2016, Ministériu Interiór estabelese ona sekretariadu ida no estrutura koordenasaun ida hodi servisu hamutuk ho liña ministériu 12 seluk no organizasaun sosiedade sivíl oi-oin atu alkansa planu ba atividade 47.

Atividade hirak ne’e, organizadu ba iha pillar haat foka ba feto sira nia partisipasaun iha lideransa no foti desizaun; prevensaun ba konflitu violentu; protesaun hosi violénsia no diskriminasaun no planu responsivu ba jéneru no justisa ba pos konflitu ba harii paz.

Liuhusi projetu “Hasa’e feto nia partisipasaun signifikativa iha harii paz no Estadu,” Governu Japaun no UN Women suporta ona Timor-Leste atu implementa ninia PAN 1325, ho foka ida ba feto nia partisipasaun no papél iha prevensaun konflitu.

Embaixadór Japaun ba Timor-Leste, Kinefuchi Masami, iha nia diskursu hatete, projetu millaun $2,8 ne’e fundu hosi Governu Japaun no implementa ho susesu tebes hosi UN Women iha tinan-hat (4) nia laran.

“Ami mós servisu hamutuk ho Governu no sosiedade sivíl Timor-Leste. Ha’u hakarak hato’o ha’u nia agradesimentu ba ema hirak ne’ebé involve ba sira nia servisu ne’ebé dedikadu,” Embaixadór Japaun, Kinefuchi Masami, hateten hodi haktuir iha komunikadu imprensa ne’ebé Agência Tatoli asesu, ohin, hosi  mídia officer Embaixada Japaun nian iha Dili.

Nia insiste, Governu Japaun suporta ajenda feto, paz no seguransa, ne’ebé haforsa feto sira-nia papél iha foti desizaun no empoderamentu ein-jerál.

” Ida ne’e parte ida hosi avansa seguransa umanu no ba atinje ODS sira,” hateten Embaixadór  Kinefuchi.

Diplomata hosi nasaun Sakura ne’e mesiona, dezde planu ne’e adopta iha 2016, nia atividade liu 52% mak implementa ona. Eventu komemorativu no hato’o projetu nia rezultadu sira sei tuir kedas ho diskusaun meza redonda ida atu revé progresu PAN 1325 no identifika area prioridade sira atu alkansa ba oin.

Vise Ministru Interiór, António Armindo, afirma  Timor-Leste nafatin komprometidu atu kontinua PAN 1325 faze segundu husi 2021-2025.

Eventu Timor-Leste nian ida-ne’e tuir malu ho eventu diskusaun global sira ba aniversáriu dala-20 ba ajenda Feto, Paz no Seguransa.

Eventu sira ne’e no relatóriu 2020 Sekretáriu Jerál ONU nian ba Feto, Paz no Seguransa subliña tiha ona, hosi area sira ne’ebé subliña, presiza ba atensaun no kompromisu ida ne’ebé boot liután ba hasa’e feto sira nia partisipasaun  iha lideransa no rezolusaun konflitu, monta alvu atu fundu di’ak liután organizasaun ba feto sira, investimentu iha dadus atu informa polítika no halais liután atu atinje progresu.

Iha fatin hanesan, Xefe Edifísiu UN Women Timor-Leste,  Sunita Caminha, hateten, iha Timor-Leste nia kontextu kompromisu ba Feto, Paz no Seguransa hanesan parte hosi nasaun nia istória ba rezisténsia no reziliénsia.

Nia dehan, ida-ne’e mak kompromisu ida ne’ebé lidera TL ba adoptasaun PAN 1325 in 2016.

“Ohin loron, nasaun ne’e tenke foti asaun sira no halo investimentu sira ba Feto, Paz no Seguransa, atu sai hanesan parte ida hosi nia futuru, ne’ebé feto iha podér hanesan  no goza direitu hanesan ba paz ida ne’ebé inkluzivu no sustentavel,” hateten Xefe Edifísiu UN Women Timor-Leste  Sunita Caminha.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here