Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

DILI, 10 novembru 2020 (TATOLI)- Iha primeira semana, fulan novembru , hosi loron 1 to’o loron 9, tinan ne’e,  Komandu Jerál Polísia Nasionál Timor-Leste (PNTL) rejista kazu asidente hamutuk 25 no asidente tráfegu 10 ne’ebé akontese iha territóriu Timor-Leste. Kazu asidente ne’e ema na’in-lima (5) mate.

“Iha primeira semana ne’e, ita rejista kazu insidente hamutuk 25 no asidente tráfegu 10 ne’ebé halo ema na’in-lima mak mate no balun kanek todan,”  portavós Komandu Jerál PNTL, Superintendente Xefe, Arnaldo de Araújo, informa ba jornalista, ohin, iha Komandu Unidade Espesiál Polísia (UEP), Bairru-Pité, Dili.

 Arnaldo klarifika, dadus ne’ebé PNTL rejista iha kuarta feira, 4 novembru 2020 komunidade sira iha Aldeia Quiri-Coli, Suku Manetú, Postu Administrativu Maubisse, Munisípiu Ainaro, hetan vítima feto ida ho naran, Virginia Mendonça, tinan 24, mate tara-aan iha ai-tutun.

Mate isin parte Polísia Investigasaun Kriminál Maubisse tenta atu lori mate isin ba hala’o autópsia, maibé família rejeita atu halo autópsia hodi deside halo kedas serimónia funerál iha matebian nia moris fatin.

Iha loron 7 novembru, akontese asidente tráfegu entre motór ho karreta soke malu iha Ponte Manlde, Caravela-Postu Administrativu Vemasse, Munisípiu Baucau rezulta vítima ida mate no na’in rua kanek todan.

PNTL halo investigasaun identifika karreta Prado mutin ho xapa matrikula 27433 ne’ebé kondús hosi suspeitu NBM, tinan 21, kondús  karreta soke motór Supra-X kór metan ho xapa matrikula F-7137 -TL hodi rezulta vítima João da Silva, tinan 33, mate fatin no nia kaben Anita Freitas, tinan 36, ho nia oan feto tinan neen (6), sofre kanek todan.

Tuir kronolojia ne’ebé rekolla hosi autoridade polísia katak, karreta ne’e halai velosidade derrepente roda oin nakfera halo motorista lakon kontrolu hodi soke hasoru matebian ho nia kaben no nia oan feto ne’ebé daudaun ne’e hala’o hela tratamentu saúde iha ospitál Dili.

Iha loron 9 novembru, akontese mós asidente tráfegu entre karreta kamioneta ho xapa matrikula 56778-TL soke motór Beat ida rezulta motorista mane ida mate fatin no vítima ida kanek todan.

Hafoin asidente, suspeitu motorista ho inisiál ACB entrega aan kedas ba parte PNTL Aileu. Asidente ne’e akontese tanba matebian no vítima ne’ebé lori motór halai velosidade la domina volante bainhira liu iha estrada subida maka soke karreta kamioneta nia okos hodi rezulta vítima mate no ida kanek todan.

Matebian oras ne’e daudaun parte PNTL entrega ona ba família sira hodi hala’o preparasaun ba funerál no suspeitu PNTL halo ona prosesu investigasaun.

Iha loron 8 novembru, PNTL rejista mós asidente tráfegu envolve motór rua iha Suku Dare halo motorista rua hetan kanek grave no daudaun ne’e hala’o hela tratamentu saúde iha ospitál Dili.

Iha loron 5 novembru 2020, PNTL Liquiça detein membru grupu arte marsiál (GAM) hosi Persaudaraan Setia Hati Terate (PSTH) na’in-haat ne’ebé hemu tua lanu todan hodi lori fatuk tuda arbiru komunidade sira-nia uma iha Suku Lauhata, Postu Administrativu Bazartete.

Iha Postu Administrativu Maliana, Munisípiu Bobonaro, PNTL rejista mós kazu agresaun fízika simples hosi joven mane ida ne’ebé halo hasoru vítima inan feton ida ho naran Angela dos Santos.

Parte PNTL halo investigasaun nota katak, vítima Angela dos Santos buti joven ne’e nia kakorok, tanba joven ne’e hasai liafuan mal respeita ba inan feton ne’e bainhira sira hasoru malu iha Merkadu Maliana.

Iha loron 8 novembru, PNTL Munisípiu Manufahi detein mós sidadaun Timoroan na’in-rua ne’ebé halo viajen ilegál hosi Fronteira Covalima, Salele, mai subar iha Manufahi.

Sidadaun na’in rua ho naran, Joaninha da Costa no nia oan feto Sabina Alves mai hosi Atambua-Indonézia iha loron 7 novembru.  Sidadaun rua ne’e parte PNTL halo tiha investigasaun entrega kedas ba ekipa médiku COVID-19 Manufahi hodi kumpre konfinamentu obrigatóriu durante loron 14 no  PNTL sei halo prosesu kazu.

 Kazu oho Aleixo kauza hosi hemu tua

Iha parte seluk, PNTL Munisípiu Lautem detein mós suspeitu AS, tinan 37, ne’ebé oho mate vítima Aleixo dos Santos, tinan 34, iha Aldeia Maulo, Suku Rasa, Postu Administrativu Lospalos,  iha  segunda (09/11).

PNTL halo investigasaun kazu omisídiu agravadu iha terrenu nota katak, suspeitu sona mate vítima iha tuku 14:05 Otl, hafoin sira haksesuk malu durante hemu tua mutin litru 10.

“Kauza hosi kazu ne’e tanba sira hemu tua lanu depois suspeitu uza tudik hodi sona vítima mate kedas iha fatin,” dehan Arnaldo hateten.

PNTL mós halo kedas detensaun ba suspeitu ho sasin hamutuk na’in-sia (9) ne’ebé hemu tua iha komunidade ida ho naran, Arlindo da Silva nia uma.

Iha Munisípiu Dili, iha loron 9 novembru, PNTL rejista mós kazu mákina gurinda ko’a kotu Estudante Universidade Nasional Timor Lorosa’e (UNTL) mane ho naran Basco Moniz hosi Fakuldade Enjeñaria.

Vítima ne’e mate iha tuku 15:00 Otl, bainhira hamutuk ho ninia kolega no ekipa tékniku Diresaun Servisu Água no Saneamentu (SAS) hala’o servisu instalasaun kanu bee moos área estrada Suku Bemori-Dili no mate isin parte polísia entrega ona ba família hodi hala’o serimónia funerál.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here