Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio  Paixão Bano. Imajen Tatoli/António Gonçalves

DILI, 10 novembru (TATOLI)—Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, propoin millaun $127 iha Orsamentu Jerál Estadu (OJE) 2021 inklui previstu millaun $14 hodi finaliza konstrusaun Ró Haksolok.

“Iha tinan 2021 ne’e, foku ba setór sosiál, COVID-19 hanesan ameasa ba dezenvolvimentu hodi asegora povu Oé-Cusse rihun 85 ne’e seguru inklui harii kuarentena iha fronteira iha Sakato, Oesilo, Pasabe no Citrana. Prioridade seluk mós kona-ba problema bee-moos, progresu projetu sira-ne’ebé la’o ona no nesesidade bázika sira,” Arsénio Paixão Bano, esplika liuhosi audiénsia públika iha Parlamentu Nasionál, tersa ne’e.

Bazea ba livru 3C (RAEOA-ZEESM) previstu iha $127,000,000 ba 2021 ne’ebé koloka ba saláriu vensimentu $11.072.049,00, bens servisu $23.775.569,00, kapital minór $2.360.470,00, kapitál dezenvolvimentu $85.506.102,00 no transferénsia públika $4.285.810,00.

Saláriu vensimentu

Despeza ba kategoria saláriu vensimentu hamutuk $11,072,049 hodi asegura saláriu no oras estraordináriu ba funsionáriu hamutuk ema na’in-2,475 ne’ebé dezagrega iha gabinete prezidente autoridade, adjunta prezidente autoridade hodi reforsa institusionál, adjuntu prezidente autoridade ba asuntu sosiál no sekretária rejionál na’in-hitu (7) iha RAEOA no ZEESM.

Nune’e mós despeza ba kategoria bens servisu $23,775,569.00 hodi asegura kustu operasionáll ba gabinete prezidente autoridade, adjuntu prezidente autoridade no sekretáriu rejionál sira hodi implementa programa ka atividade iha RAEOA no ZEESM-TL.

Liña rúbrika orsamentál hosi bens servisu ne’e, Prezidente Autoridade mak sei halo desizaun ba despeza liña rúbrika servisu operasionál hosi Sekretariadu rejionál asunto edukasaun, saúde, traballu no reinsersaun komunitáriu, finansa, administrasaun, agrikultura no komérsiu indústria hodi atende no halo jestaun ba administrasaun refere.

Iha bens servisu ne’e prevee liña rúbrika manutensaun no kombustível maioria koloka orsamentu boot iha reponsabilidade prezidente autoridade nia gabinete, atu haree liu ba kombustível ba EDTL Inur Sakato, iha mós relasiona ho ekipamentu pezadu sira-ne’ebé hala’o hela atividades iha Oé-Cusse.

Nune’e mós liña rúbrika sira seluk iha kategoria bens servisu ne’e nu’udar kustu operasionál ba funsionamentu prestasaun servisu iha RAEOA no liña rúbrika viajen estranjeiru hodi atende reuniaun iha rai-li’ur no halo divulgasaun programa RAEOA no ZEESM-TL, mobilizasaun parseiru no investidór sira.

Iha bens servisu ne’e sita liña rúbrika formasaun profesionál no semináriu hodi atende formasaun ba joven iha Oecusse, formasaun profesionál ba funsionáriu RAEOA no ZEESM-TL, kursu profesionál iha nasaun Portugál inklui kursu ingles no portugés.

Iha kategoria bens servisu ne’e hamosu liña rúbrika asisténsia téknika hodi asegura saláriu ba asesór na’in-28, konsultór nasionál sira no tékniku profesionál sira seluk no liña rúbrika servisu operasionál hodi asegura kustu servisu operasionál ba nesesidade sekretáriu rejionál na’in-hitu (7).

Liña rúbrika bens servisu ne’e nu’udar responsabilidade tomak ba prezidente autoridade mak sei halo desizaun ba despeza asosiadu ho atividade operasional liuliu ba operasionál limpeza sidade no edifísiu.

Kapitál minór

Entretantu, kapitál minór hamutuk $2,360,470.00 ba tinan 2021 atu asegura kondisaun bázika ba Gabinete Prezidente Autoridade no  Gabinete Sekretária rejionál sira ba sosa karreta ambulánsia, kareta tanki bee-moos, karreta operasionáll, komputador/laptop, printer, mákina fotokopia, mobiliáriu, AC no seluk tan.

Kapitál dezenvolvimentu

Purtantu kapitál dezenvolvimentu hamutuk $85,506,102 ba 2021, hosi montante refere, RAEOA no ZEESM-TL prevee orsamentu $56,262,790 hosi likides própriu no Governu Sentrál sei aloka montante $29,243,312 mai hosi fundu petrolíferu hodi finánsia no asegura obras sira-ne’ebé la’o hela nomoos ba obra foun tuir prioridade VIII Governu Konstitusionál nian.

Transferénsia públika

Iha parte transferénsia públika hamutuk $4,285,810.00 hodi asegura kustu ne’ebé ho natureza subvensaun públikas. Liña rúbrika ida-ne’e nu’udar responsabilidade tomak ba Prezidente Autoridade hola desizaun ba despeza.

Despeza hirak mak sei apoia Asosiasoens koperativa, ONGs no UNDP, subsídiu ba Konsellu Suku, PAAS no dezastre naturál no merenda eskolár no konsesaun eskolár.

Fundu espesial dezenvolvimentu

Iha livru 3C (RAEOA-ZEESM) prevee mós rúbrika keta-ketak ida ho naran Fundu Espesiál Dezenvolvimentu (FED) ho montante $14,000,000.00 ba ezekuta hodi finaliza konstrusaun Ró Haksolok.

“Ho nune’e bele fó retornu finanseiru mai iha RAEOA no ZEESM-TL. Orsamentu ba FED ho valór millaun $14 engloba ona iha kategória kapital dezenvolvimentu,” dokumentu orsamentál previstu iha livru 3C (RAEOA-ZEESM), ne’ebé asina hosi Ministra Finansa Interina, Sara Lobo Brites.

Jornalista: Evaristo Soares Martins

Editór: Cancio Ximenes

1 KOMENTÁRIU

  1. Presija haree didiak…orsamentu ba RAEOA nian tanba Rubrika tenki tau atensaun dudiak…ro haksolok nee, sei hasai tan 14 miloens nee,,laiha lojika….husu governu Central tenki haree didiak ida nee

Leave a Reply to Beny Cancel reply

Please enter your comment!
Please enter your name here