Ministru Administrasaun Estatál, Miguel Pereira de Carvalho. Imajen Tatoli/Egas Cristovão

DILI, 10 novembru 2020 (TATOLI)—Polítika VIII Governu Konstitusionál lideradu Primeiru Ministru Taur Matan Ruak, aloka millaun $57.7 ba autoridade munisipál haat (no) administrasaun munisipál ualu (8) iha proposta-lei Orsamentu Jerál Estadu (OJE) 2021.

“Orsamentu ba munisípiu sira hamutuk millaun $57.7, ne’e inklui ona millaun $6 ba PDIM (Programa Dezenvolvimentu Integradu Munisipál),” Ministru Administrasaun Estatal, Miguel Pereira de Carvalho, informa ba jornalista sira, hafoin halo audiénsia ho Komisaun A (Justisa no Konstitusionál), iha sala konferénsia Parlamentu Nasionál, tersa ne’e.

Montante orsamentu millaun $6 ne’ebé previstu ba Programa Dezenvolvimentu Integradu Munisipál (PDIM) ne’e prevee liuhosi kapitál dezenvolvimentu.

Bazea livru 3B (munisípiu sira) previstu politika VIII Governu Konstituisional aloka ona orsamentu própriu ba autoridade no administrasaun munisipál iha tinan 2021 hamutuk millaun $57.739 ne’ebé kompostu hosi saláriu vensimentu millaun $14.97, bens servisus millaun $13.06, transferénsia públika millaun $22.09, kapitál minór millaun $1.62 no kapitál dezenvolvimentu millaun $6,000.

Iha livru munisípiu ne’e sita mós totál despeza própriu hirak ne’e inklui ona orsamentu ba programa PDIM foun, subsidiu rihun $100 ba kada postu administrativu.

Montanate orsamentu millaun $57.739 ne’e aloka ba autoridade munisipál haat (4) kompostu Baucau millaun $5,702, Bobonaro millaun $5,332, Dili millaun $9,059 no millaun $5,022 ba Ermera.

Nune’e mós administrasaun munisipál ualu (8) kompostu hosi Aileu millaun $3,173, Ainaro millaun $3,672, Covalima millaun $4,679, Lautém millaun $4,416, Liquiçá millaun $3,600, Manufahi millaun $4,010, Manatuto millaun $ 4,568  no Viqueque millaun $4,507.

Livru 3B konsidera nu’udar dukumentu orsamentál ida-ne’ebé presiza informa ba públika kona-ba despeza Estadu ne’ebé kontribui ba dezenvolvimentu munispipál to’o iha nível suku inklui mós atividade sira implementa hosi nível nasionál no apoia finanseira hosi parseria dezenvolvimentu tuir ministériu/ajénsia.

Iha livru 3B ne’e fundamenta, atu kumpre implementasaun Planu Estratéjiku Dezenvolvimentu (PED) 2011-2030. Hosi ida-ne’e VIII Governu Konstitusionál realiza Roteiru ida-ne’ebe defini ona setór 3 (tolu) fundamentál mak dezenvolvimentu kapitál sosiál, ekonómiku no infraestrutura bázika inklui setór Institusional.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here