Adjuntu Sektretáriu Jerál Partidu KHUNTO, Zetó Patrício. Imajen TATOLI/Osória Marques.

DILI, 10 novembru 2020 (TATOLI)—Atu komemora Masakre Santa Crus 12 Novembru 1991 ba dala-XXIX no selebrasaun loron Nasionál Juventude ba dala-15, ohin, Partidu Kmanek Haburas Unidade Nasionál Timor Oan (KHUNTO) ho inisiativa halibur juventude na’in-250 hosi partidu KHUNTO halo doasaun raan hodi oferese ba Hospitál Nasionál Guido Valadades (HNGV).

Adjuntu Sektretáriu Jerál Partidu KHUNTO, Zetó Patrício hateten, juventude hosi partidu KHUNTO nian halo doasaun raan ba HNGV tanba tuir prinsípiu partidu KHUNTO nian katak “Tane Ó Rain, Ó Emar no Ó lisan” entaun momentu ida-ne’e hanesan oinsá tane malu liuhosi doasaun raan atu salva maluk seluk-nia vida.

“Tane malu la’os ko’alia de’it maibé oinsá fó moris ba malu. Tanba ida-ne’e, ho prinsípiu báziku katak hodi raan buka raan no hodi raan mós salva raan, nune’e loron 12 novembru nu’udár juventude nian. Tanba ne’e mak juventude hosi partidu KHUNTO ho inisiativa atu selebra 12 novembru ba dala XXIX ida-ne’e hodi kontribui nia raan atu salva maluk sira seluk. Tanba liuhosi raan turuk ida ita sei salva ema-nia vida,” dehan Zetó Patrício ba jornalista sira iha Rezidénsia Koselleru Másimu Partidu KHUNTO, José dos Santos Naimori Bukar, Manleuana Dili, tersa ne’e.

Nia hatutan partidu KHUNTO hala’o atividade doasaun raan tanba parseria ho Banku Sangue Nasionál (BSN).

“Ita iha ne’e servisu hamutuk ho Ministériu saúde maibé ita-nia ema iha profisionál saúde hosi ospitál nasionál sangue nian mai iha ne’e hodi hasai raan,” nia dehan.

Nia haktuir, juventude na’in-250 ne’ebé halo doasaun raan ne’e la’os hosi Dili de’it maibé balu mai hosi munisípiu.

Nia esklarese, Partidu KHUNTO alainde halo doasuan raan sei iha mós ativdade sira-ne’ebé sei hala’o mak halo limpreza jerál hosi Igreja Motael to’o Semitériu Santa Cruz hahú aban no sei koordena ho Comite 12 Novembru hadia Semitériu Santa Cruz.

Iha fatin hanesan, reprezentante Xefe Unidade Banku de Sangue, Arsénio Afonso, agradese ba estrutura Partdu KHUNTO-partidu juventude sira-nian tanba bele oferese ona raan turuk ida hodi salva ema seluk nia vida.

“Ami hato’o agradese ba juventude hosi partidu KHUNTO tanba bele oferese ona raan turuk ida hodi salva ba ita-nia maluk sira ne’ebé presiza raan iha Hospitál Nasionál Guido Valadares no mós ba ospitál rejionál sira iha Timor-Laran tomak,” nia hateten.

Tanba, nia dehan, raan mós parte ida ema-nia vida katak ema moris presizaa raan maibé ema  laiha raan make ema ne’e labele moris iha mundu ida ne’e.

Nia esplika kritéria ba ema-ne’ebé atu halo doasaun aran mak  tenke kondisaun di’ak, deskansa normál hahú oras ualu (8) antes hala’o doasaun  raan, idade tinan 18-60, ema-nia todan maizumenus 45 kilograma ba leten, la hala’o tratamentu kualker ba moras ruma, la hemu tua ka droga, tensaun normál 120/80, no liu ida-ne’e labele hasai raan.

“Ita halo doasaun raan nia benefísiu mak ita bele halo regenerasi ba raan mean (darah merah) ba ita-nia isin lolon ne’ebé bele fó isin-di’ak ba saúde,” nia dehan.

Jornalista: Osória Marques

Editór: Cancio Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here