Ilustrasaun karreta kontentór movimenta iha estrada públiku. Imajen/Espesiál

DILI, 10 novembru 2020 (TATOLI)—Atu hamenus engrrafamentu no asidente tráfegu iha kapitál Dili, Ministériu Transporte no Komunikasaun (MTK) no Ministériu Interiór (MI) hahú halo diskusaun ba ezbosu hodi regula movimentu karreta kontetór sira iha kapitál Dili.

Ministru Transporte no Komunikasaun, José Agostinho da Silva, hasoru malu ho Primeiru-Ministru (PM) no Ministru Interiór, Taur Matan Ruak, hodi koa’lia kona-ba planu regula movimentu transporte boot.

Notísia Relevante: DNTT Sei Regula Movimentu Kontentór iha Dili Laran

“Ami-nia planu atu regulariza movimentu transporte kontetór sira ne’ebé halo movimentu iha loron no rezulta engrrafamentu no asidente tráfegu, entaun ita presiza regula sira atubele hala’o atividade ne’e iha kalan,” Ministru José Agostinho informa iha Palásiu Governu, tersa ne’e.

Atu regulariza, governante ne’e dehan, MTK hato’o ona pedidu ba MI, Ministériu Finansa (MF), Ministériu Turizmu, Komérsiu no Indústria (MTKI) hodi halo ezbosu konjuta.

“Ami diskute ona, maibé atu asina ezbosu ne’e, Ministériu Transporte no Komunikasaun no Ministériu Interiór maka asina, nune’e bele regula movimentu kontetór sira no sei implementa iha tinan 2021,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here