Ministru Transporte no Komunikasaun, José Agostinho da Silva. Imajen TATOLI/Egas Cristovão

DILI, 10 novembru 2020 (TATOLI)—Ministru Transporte no Komunikasaun, José Agostinho da Silva, halo enkontru ho Primeiru-Ministru (PM), Taur Matan Ruak, hodi informa progresu serbisu no planu asaun atu implementa iha tinan 2020 no 2021.
”Ha’u mai relata progresu serbisu kona-ba asegura rede telekomunikasaun iha períodu ezekusaun orsamentu no ligasaun trasportasaun marítima ba parte súl no norte,” Ministru José Agostinho hateten hafoin enkontru ho Xefe Governu, iha Pálasiu Governu, tersa ne’e.

Kona-ba rede telekomunikasaun Ministériu Transporte no Komunikasaun (MTK) deside loke konkursu públiku no operadór telekomunikasaun Telekomcel hosi Indonézia mak sai vensedór hodi subtitui empreza WebSatMedia Pte Ltd (WSM)  hosi Singapura, tanba kontratu ramata ona iha 31 outubru.

“Ami tenke asegura liña internet, liuliu funsionamentu free balance no rede ne’ebé mak iha kualidade ba ajénsia no instituisaun Estadu hamutuk  205 ho bandwith 200 megabyte/segundu, ne’ebé antes ne’e ajénsia Estadu 140 mak asesu,” nia akresenta.

Tuir governante ne’e, ezekutivu sira hatun desizaun ba interese Estadu, atu asegura rede internet ho kapasidade di’ak hodi asegura funsionamentu insitutisaun ida-idak

Aleinde ne’e, Ministru mós informa ba Xefe Governu kona-ba polítika atu konkretiza ligasaun liña marítima ba parte norte no súl.

“Ita hotu hatene katak oras ne’e daudaun ró Berlin Nakroman II halo hela konstrusaun iha nasaun Xina no tuir oráriu ró-ahi ne’e sei finaliza  iha setembru 2021,” nia hatutan.

Ró ne’e sei halo operasaun iha parte leste, norte no súl iha illa Timór atubele fasilita populasaun iha munisípiu Manatuto, Buacau, Lautém, Viqueque, Same no Suai.

“Ita-nia ró-ahi halo ona konstrusaun, maibé kondisaun agora portu sira laiha, nune’e ita planu ona iha orsamentu 2021 atu asegura no aselera kondisaun molok ró mai halo operasaun,”  Ministru katak.

Iha mós planu atu halo konstrusaun terminál rejionál hodi loke espasu iha kapitál Dili.

“Ita sei muda terminál Becora ba Hera no Tasi-Tolu ba Tibar atu fó espasu ba transporte públiku sira buka rendimentu ho di’ak,” nia tenik.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here