Ministru Defeza, Filomeno da Paixão de Jesus, simu audensia ho Embaixadóra Estadus Unidus Amérika (EUA) ba Timor-Leste, Kathleen M. Fitzpartrick. Imajen/Mídia MD

DILI, 10 novembru 2020 (TATOLI)- Embaixadóra Estadus Unidus Amérika (EUA) ba Timor-Leste, Kathleen M. Fitzpartrick, ohin, hala’o enkontru ho Ministru Defeza, Filomeno da Paixão de Jesus ,hodi hato’o kumprimentu no despedida ba ninia mandatu ne’ebé sei termina iha Timor-Leste.

Notísia Relevante : Forsa Navál EUA Kompleta Projetu 100 iha Timor-Leste

Embaixadóra Kathleen M. Fitzpartrick dehan, nia sente orgullu tebes durante hala’o misaun iha Timor-Leste koopera di’ak tebes ho lider sira hotu iha Timor-Leste.

Kathleen dehan, mezmu nia mandatu termina ona, maibé Estadu Unidus Amerika sei kontinua apoiu Timor-Leste iha area asisténsia umanitária, seguransa marítima nian no área seluk tan.

“Ami atinje ona objetivu importante hanesan estabelese parseira ho Estadus Unidus Amérika iha Road Island ho F-FDTL hodi ko’alia kona-ba ami nia programa profisionalizmu no edukasaun militár nian. Ofisiais F-FDTL no funsionáriu Ministériu Defeza hamutuk na’in-15 ba hala’o ona sira nia estudu iha EUA,” dehan Embaixadóra Kathleen ba jornalista iha edifísiu Ministériu Defeza, segunda (09/11).

Kathleen dehan, militár EUA no F-FDTL kontinua hala’o Ezersísiu “Harii Hamutuk” hanesan ezersísiu bilaterál no multilaterál iha futuru.

Iha fatin hanesan, Ministru Defeza, Filomeno da Paixão de Jesus, hato’o agradese  ba Embaixadóra  Kathleen ba iha nia dedikasaun iha area diplomasia defeza nian no agradese mós ba kooperasaun defeza ne’ebé EUA estabelese ona ho povu Timor-Leste no F-FDTL la’ós hanesan parseiru de’it, maibé hanesan mós aliadu.

Ministru dehan, durante tinan-tolu nia haree servisu embaixadóra nian koopera di’ak tebes ho Governu Timor-Leste.

“Ita agradese durante tinan-tolu iha Timor-Leste, Embaixadóra Kathleen M. Fitzpartrick hala’o servisu no kria kooperasaun barak ne’ebé ita asina ona sei kontinua nafatin ba oin,” nia hateten.

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here