Ministru Administrasaun Estatál, Miguel Pereira de Carvalho. Imajen Tatoli/Egas Cristóvão

DILI, 10 novembru 2020 (TATOLI)—Ministériu Administrasaun Estatal lideradu Miguel Pereira de Carvalho, prioritiza desentralizasaun administrativa no organizasaun urbana iha proposta-lei Orsamentu Jerál Estadu (OJE) tinan fiskál 2021.

“Ministru Administrasaun Estatal propoin por volta millaun $53 ($52,809,097) ne’e ba servisu sentrál sira inklui osan ba PNDS. Ami-nia medida prinpál ba 2021 mak desentralizasaun administrativa, organizasaun urbana, dezenvolvimentu suku no retornu ekonómiku no medida importante sira seluk,” Ministru Miguel Pereira de Carvalho informa ba jornalista sira, hafoin halo audiénsia públika ho Komisaun A (Justisa no Konstitusionál) iha sala konferénsia, Parlamentu Nasionál, tersa ne’e.

Bazea livru Planu Asaun Anuál previstu medida prinsipál setoriál hosi MAE ba tinan fiskál 2021 mak dezenvolve desentralizasaun administrativa, dezenvolve kapasidade institusionál no rekursu umanu, hamosu kondisaun hodi halo instalasaun autarkia lokál ho efetiva, prezerva no konserva istória no kultura Timor-Leste nian liuhosi konservasaun dokumentu istóriku sira.

Nune’e mós asegura administrasaun eleitorál,  kontribui hodi halo redusaun dezigualdade jéneru, hadi’a kondisaun sosiu-ekonómika, governasaun lokál, dezenvolvimentu juventude iha nível munisipál, postu administrativu no suku.

Ministériu Administrasaun Estatal mós sei promove dezenvolvimentu suku no retornu ekonómiku liuhosi PNDS, hamosu sistema toponímia: naran ba dalan sira (nome para as ruas), númeru edifísiu públiku, jardín, parke, largo iha territóriu Timor-Leste nian no promove boa governasaun iha ministériu refere.

Hosi medida prinsipál ne’e, Ministériu Administrasaun Estatal propoin orsamentu $52,809,097 (millaun $53) ba tinan fiskál 2021, inklui $31,416,640 ba implementasaun atividade kona-ba medida planu rekuperasaun ekonómika.

Hosi montante orsamentu $52,809,097 ne’e koloka ba saláriu no vensimentu $3,669,695, bens servisu $10,874,051, kapitál minór $4,764,757, kapitál dezenvolvimentu $330,000, transferénsia públika $33,170,594.

Alokasaun orsamentál kada programa

Alokasaun orsamentál kada programa ho kódigu 412 kona-ba implementasaun polítika jéneru sei gasta $50,040, programa ho kódigu 510 kona-ba boa governasaun no jestaun institusionál sei gasta $8,424,777, programa ho kódigu 511 kona-ba organizasaun urbana $90,000, programa ho kódigu 512 kona-ba desentralizasaun administrativa $3,054,470.

Nune’e mós programa ho kódigu 513 kona-ba prezervasaun no konservasaun dokumentu ho valór istóriku $354,521, programa ho kódigu 517 kona-ba edministrasaun eleitorál sei gasta $3,113,036 no progarama ho kódigu 518 kona-ba dezenvolvimentu suku no retornu ekonómiku báziku $37,722,253.

Iha audiénsia públika ne’e partisipa mos autoridade munisipál 12 no entidade ne’ebé tutela ba ministériu refere.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here