Diretór IDN-TL Capitão – de Mar- e Guerra, Donaciano Costa Gomes “Pedro Klamar Fuik”. Imajen/IDN-TL

DILI, 10 novembru 2020 (TATOLI)- Institutu Defeza Nasionál Timor -Leste – (IDN-TL) sei realiza serimónia graduasaun ba formandu kursu Formasaun Avansada Governansa no Lideransa Estratéjika- CFAGLE hamutuk na’in-150.

Notísia Relevante : Uniaun Europeia iha kompromisu apoia formasaun sira iha IDN-TL

Nota komunikadu imprensa ne’ebé Agência Tatoli asesu hosi IDN-TL relata katak ajenda serimonia graduasaun ba formandu sira-ne’e sei hala’o iha  loron 13 novembru 2020, iha salaun Ministériu Finansas, Dili.

Formandu sira-ne’e, na’in 50 kargu xefia hosi diretór jerál no inspetór jerál, no formandu na’in-100 mai hosi diretór nasionál hosi liña ministeriál sira ne’ebé hala’o sira-nia knaar nu’udar tékniku profisionál.

Diretór Servisu Akadémiku IDN, Guilherme Soares, hateten, programa ne’ebé IDN-TL planeadu atu halo mak hanesan, konferénsia hosi alunu sira hosi turma 3: a) kona-ba Reziliénsia hosi Funsaun Públika, b) Progresaun de Carreira no c) importánsia hosi Organizasaun Funsaun Públiku, sei fó mós atribuisaun sertifikadu, iha mós sesaun kulturál.

“Liu hosi distribui sertifikadu ba formandus Kursu Formasaun Avansada Governansa no lideransa estratéjika (CFAGLE) iha serimónia graduasaun ne’e, hanesan rekoñesimentu ba sakrifisiu ne’ebé formandu sira hatudu durante fulan tolu,” Diretór Guilherme esplika liu hosi karta komunikadu imprensa  ne’e.

Durante serimónia, IDN-TL sei konvida na’i-ulun sira hosi órgaun soberanu haat (4), ministru, vise ministru, no sekretáriu estadu relevante sira, sosiedade sivíl no konvidadu seluk tan.

Serimónia graduasaun ba CFAGLE realiza tanba hetan kolaborasaun hosi Komisaun Funsaun Publika (CFP), Instituto Nasionál Administrasaun Públika  (INAP), no apoiu fundus hosi Fundu Dezenvolvimentu Kapitál Umanu (FDCH), IDN-TL tanba hetan orientasaun hosi Primeiru-Ministru, Taur Matan Ruak, liuhosi Gabinete Primeiru-Ministru.

Kursu CFAGLE, IDN realiza tiha ona, dezde jullu no remata iha  outubru 2020 ba turma tolu (3). Hosi turma A ba formandu diretór jerál no inspetór jerál hamutuk na’in-50, turma B ho C ba formandu diretór nasionál hamutuk na’in-100.

Matéria ba formandu iha CFAGLE, iha módulu 5, módulu dahuluk kona-ba prosesu reziliénsia Nasionál iha unidade kurikulares lima. Modulo daruak mak persesaun Seguransa no Defeza Nasionál RDTL nian ne’ebé hanorin hosi Diretór IDN Capitão-de-Mar-e-Guerra, Donaciano Costa Gomes “Pedro Klamar Fuik”.

Módulu datoluk Prioridade Governu, Polítika Públikas no Jestaun Estratéjika hanorin hosi José Antonio da Costa hosi UNTL. Kona-ba Direitu Administrativu hanorin hosi Avelino Coelho. Modulo dahaat kona-ba Sistema Jurídiku no Governansa nian hanorin hosi Avelino Coelho.

Iha mós aulas ba Informasaun Teknolojia no Komunikasaun hanorin husi Diretór Servisu Akadémiku, Guilherme Soares, ne’ebé relasiona liu ho risku ne’ebé mak Timor-Leste enfrenta iha informasaun teknolojia nian durante COVID-19 nian e depois revizaun dijitál kona-ba Timor-Leste nian no mós cyber-security.

Iha módulu dahaat ne’e mós, iha aulas kona-ba konvensaun internasionál tratadu no akordu ne’ebé hanorin husi Dionisio Babo kona-ba matéria Planeamentu Atividade Anuál hodi hosi Dionisio dos Santos ne’ebé hosi Gabinete Primeiru-Ministru no iha módulu dalima, kona-ba Konsetualizaun Nasionál ho vizaun instituisaun estratéjika sira iha área defeza no seguransa nian iha kuartél Jenerál F-FDTL Fatuhada Dili, Komandu Jerál PNTL, oinsá formandu sira bele koñese di’ak liután, instituisaun sira ne’e ida-idak nia papél.

Vizita estudu ba ministériu saúde, oinsá formandu sira koñese di’ak liután papél Ministériu Saúde nian relasiona ho surtu COVID-19 no planu sira ne’ebé ministériu rasik iha relasiona ho polítika saúde nian.

Vizita ikus ba Jardim Eroi Metinaro, Dili, oinsá formandu sira atu memoriza fila fali eroi sira ne’ebé mak luta ba Timor-Leste nia independénsia, nune’e sira bele inspira di’ak liu sakrifisiu eroi sira nian hodi bele serve di’ak liu Estadu.

Objetivu prinsipál hosi CFAGLE atu dezenvolve kompeténsia téknika ne’ebé adekuada ba dezenvolvimentu diresaun superiór sira hosi administrasaun publika kompostu hosi  kargu xefia sira hanesan jestór públiku sira, kadavés presiza iha prioridade ba sira, liu-liu dezenvolve sira-nia kapasitasaun ba servisu interese públiku nian.

Alende ne’e mós, haforsa liután rede entre superiór administrasaun públika sira, oinsá sira bele iha rede ida ne’ebé forte hodi servisu hamutuk iha futuru.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here