Adjunta Sekretária Jerál KO25 no atuál Prezidente CNJTL, Maria Dadi Soares Magno. Imajen Tatoli/Antónia Gusmão

DILI, 10 novembru 2020 (TATOLI)—Prezidente Conselho Nacional Juventude Timor-Leste (CNJTL-sigla portugés), Maria Dadi Magno, hateten setór dezempregu ne’e problema nasionál tanba ne’e Governu tenke responsabiliza.

Notisia Relevante: Joven purvolta rihun 48 laiha oportunidade bá eskola

“Problema dezempregu ne’e problema nasionál, Governu mak tenke responsabiliza maibé la’ós Governu no Estadu de’it maibé inklui ho sosiedade sivíl tanba kestaun hirak ne’e presiza ita hotu nia kontribuisaun hodi lori dezenvolvimentu ba nasaun ne’e,” Prezidente CNJTL, Maria Dadi Magno, ba jornalista Agência TATOLI bainhira partisipa iha serimónia selebrasaun 12 novembru iha salaun Xanana Sport Center, Bairru Formoza, Dili. tersa ne’e.

Maria Dadi Magno, hateten problema juventude hanesan problema ne’ebé kompleksu tebes, tanba ne’e bele dehan la’ós kestaun ba Governu liuhosi Ministériu Edukasaun Juventude no Desportu (MEJD) de’it maibé interministeriál hotu ne’ebé liga ba asuntu joven.

Iha polítika nasionál CNJTL nian, nia dehan, identifika problema boot lima (5) ne’ebé liga ba juventude hanesan edukasaun, saúde, empregu empregalidade, partisipasaun sívika no mós violénsia no krime.

“Isu boot lima ne’e ita husu ba Estadu atu iha komitmentu. Sira iha komitmentu duni maibé seidauk iha konsisténsia tanba Estadu seidauk halo implementasaun,” nia hateten.

Maibé, nia dehan, iha pilár lima ne’e Governu implementa ona programa balu hanesan saúde maibé seidauk bele hatene sasukat hosi implementasaun refere tanba CNJTL la’ós atu halo sasukat ba problema maibé CNJTL hakarak Governu investe polítika nasionál lima ne’e ba juventude sira.

Entaun, nia hateten, CNJTL halo estratéjika polítika nasionál lima ne’e ba grupu alvu sira hodi sai programa no planu ba Governu hodi implementa, tanba dever CNJTL mak servisu hamutuk ho Governu.

Nia dehan, Estadu tenke investe ba joven tanba situasaun realidade ne’ebé hatudu katak ka tinan joven sira akaba nível sekundáriu no universidade ne’ebé mak CNJTL identifika kuaze iha rihun 15-20, ho ne’e CNJTL halo intervensaun polítika ba estratéjia hodi kontribui ba Estadu kona-ba espasu ba joven sira.

“Tanba kampu traballu laiha no mínimu tebes entaun ita hakarak halo advokásia no oinsá mak fó ideia ba Governu hodi bele traxa polítika integradu. Ita-nia papél mak atu motiva, enkoraja no dudu joven sira atu partisipa no oinsá sira bele foti desizaun,” nia hateten. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here