Aviaun ZEESM. Imajen/twinotterarchive.

DILI, 10 novembru 2020 (TATOLI)—Governu liuhosi Ministériu Transporte no Komuikasaun (MTK) iha ona hanoin atu transforma aviaun Zona Ekonomia Espesiál Sosiál Merkadu (ZEESM) ba aviaun komersiál.

Ministru Transporte no Komunikasaun, José Agostinho da Silva, konsidera tempu ona Timor-Leste iha transporte aérea nasionál hodi bele hatama reseita ba kofre Estadu.

“Ita-nia planu sei transforma aviaun ZEESM atu sai aviaun komersiál dahuluk Timor-Leste nian,” Ministru José Agostinho informa hafoin enkontru ho Primeiru-Ministru, Taur Matan Ruak, iha Palásiu Governu, tersa ne’e.

Tuir planu, ekipa hosi Autoridade Aviasaun Sivíl Timor-Leste (AACTL, sigla portugés), sei desloka ba Rejiaun Administrativa Espesiál Oé-cusse Ambeno (RAEOA) iha  tempu badak atu diskute kona-ba prosesu transformasaun ne’e.

“Ita-nia tékniku sira husi parte Autoridade Aviasaun Sivíl Timor-Leste no  instituisaun relevante sira forma ona ekipa atu iha tempu badak sei dezloka ba RAEOA, halo diskusaun kle’an  ba rekezitu legál, rekursu umanu no planu ba oin antes halo transformasaun,” nia akresenta.

Nune’e, governante ne’e dehan, ba kestaun ne’e Xefe Governu konkorda no fó apoia planu transformasaun ne’e hodi bele fasilita pasajeiru sira.

Daudaun aviaun ne’e halo operasaun doméstika hosi Dili-Oé-cusse no Dili bá Suai.

Folin billete aviaun ZEESM husi Dili-Oé-cusse $25, enkuantu Dili-Suai ba klase VIP $30 no ba klase ekonomia $25.

Iha loron iha 04 abríl, Governu deside suspende provizóriu operasaun komersiál internasionál husi nasaun li’ur, maibé la mensiona kona-ba voo komersiál doméstiku.

Jornalista: Florêncio Miranda Ximenes

Editora: Júlia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here