Imajen/Facebook: Dadi Magno Alves.

DILI, 10 novembru 2020 (TATOLI)–Prezidente Conselho Nacional Juventude Timor–Leste (CNJTL), Maria Dadi Magno, hateten haree ba taxa mortalidade ba joven feto sira ne’ebé mak sai inan ho minoridade mak sai problema sosiál ne’ebé afeta tebes ba asuntu juventude nian.

Notísia Relevante: CNJTL:Joven la’ós autór ba krime

“Ita haree joven sira-ne’e moris la saudável hanesan má-nutrisaun tanba hahan la saudável. Haree ba taxa mortalidade ba joven feto sira ne’ebé mak sai inan ho minoridade mak sai problema sosiál ne’ebé afeta tebes ba asuntu juventude nian. Joven mileniál ne’ebé mak la menus sentidu atu hadomi Timor ho sentidu patriotizmu no nasionalizmu tenke hadomi nia aan no hadomi nia saude,” Prezidente CNJTL, Maria Dadi Magno, haktuir iha abertura semináriu ba selebrasaun loron 12 novembru no loron nasaionál juventude bad ala-15 iha Salaun Delta Nova, Comoro, Dili, tersa ne’e.

Tanba ne’e, Maria dadi husu ba Estadu iha obrigasaun atu investe makaas iha área juventude nian tanba problema ne’ebé juventude sira hosoru mak agora sira tama ona ba idade produtivu maibé sira seidauk hetan servisu no balu tanba ekonómia uma-laran tenke hapara sira-nia eskola.

“Joven barak mak moris iha risku nia laran. Entaun, Estadu presiza tau atensaun ba problema sira-ne’e,” Maria Dadi Magno hateten.

Atu hetan servisu ho dignu, Maria Dadi, husu ba juventude mileniál Timor-Leste tenke respeita luta na’in no estuda makaas hodi sai eselente no bele fahe matenek ne’e ba sosiedade.

“Ha’u husu ba juventude mileniál sira tenke respeita luta na’in sira hotu tenke estuda makaas hodi sai eselente ho matenek ne’ebé iha presiza fahe no partilla ba sosiedade. Imi tenke fó esperansa tanba imi maka joven futuru no joven prezente, presiza kuda dutrina no hadomi Timor iha imi ida-idak nia-fuan,” Maria Dadi Magno hateten.

Aleinde ne’e, nia dehan, juventude sira tenke iha esperansa no sentidu patriotizmu hodi respeita no dignifika eroina no eroi juventude loriku asswa’in no sobrevivente hotu ne’ebé mak sakrifika sira nia-aan no sofrementu tomak hodi atinje ba mehi Timor-Leste nian bele hetan independénsia.

Maria Dadi hateten, Estadu rekoñese luta rezisténsia iha faze tolu mak hanesan frente armada, klandestina, no diplomátiku. Frente tolu ne’e, tuir nia, iha tempu uluk sira halo servisu ho matenek iha inimigu nia le’et no hamosu sakrifísiu ba mane no feto rihun ba rihun liuliu foinsa’e sira, tanba sira fó sira nia-aan ba funu ida-ne’e hodi hetan liberdade no independénsia ba ukun rasik-aan.

“Ho sira-nia espiritu joventude loriku asswa’in hodi kontinua eziste juventude pasadu liuliu juventude ohin nian, imi mak mai partisipa hela serimónia ida-ne’e no imi mak juventude mileniál,” Dadi dehan.

Iha konstituisaun artigu 19 versiklu 1 ko’alia klaru ona katak Estadu Timor-Leste promove no fó korajén ba juventude atu halo buat tolu, konsolida unidade nasionál, rekonstrusaun país, defende no dezenvolve país.

Notísia Relevante: CNJTL fó formasaun lideransa no edukasaun sidadania ba jovén sira

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here