DILI, 09 novembru 2020 (TATOLI) – Torneiu futeból salaun (Futsal) Ministériu Asuntu Parlamentár no Komunikasaun Sosiál (MAPKOMS) ne’ebé hala’o, ohin lokraik, iha kampu multifunsaun Bebora, Dili, ekipa feminina Banku Sentrál Timor – Leste (BCTL-sigla Portugés) susesu manan nia adversáriu Palásiu Prezidente Repúblika (PR) ho golu 3-1.
Notísia Relevante : PR manán PN ho golu úniku
Jogu primeira parte hahú ekipa rua halo kedan kontra ho atake. Maibé ekipa BCTL domina liu bola hodi halo presaun maka’as ba ekipa PR.
Hosi presaun hirak ne’ebé ekipa BCTL halo la hela de’it hanesan presaun, maibé hatudu rezultadu tanba jogadora Carla (5) uza oportunidade bola livre iha oin hodi marka kedan golu da-uluk hodi muda rezultadu ba 1-0.
Hosi rezultadu ne’e hasa’e liután vontade jogadora BCTL nian iha kampu laran. Nune’e jogu manas liután. Mezmu ekipa PR responde ho presaun, maibé la rezulta golu no presaun hirak ne’e hela de’it hanesan presaun.
Golu Carla nian ne’e mak hanesan golu ne’ebé hodi termina jogu primeira parte rezultadu provizóriu lidera hosi BCTL.
Hakat ba segunda parte jogu sai manas liután tanba hetan apresiasaun maka’as hosi adeptu parte rua. Maibé, jogadora Carla (5) hosi BCTL nafatin sai primadona iha kampu laran hodi prodús tan golu ida hodi lori rezultadu hatuur ba 2-0.
Rezultadu dook ona. Ekipa BCTL nafatin domina bola iha kampu laran hodi halo jogadora PR sira halai sala to’o la fura rede BCTL.
PR nafatin esforsu maski rezultadu dook ona. Esforsu hirak ne’e la hela de’it hanesan esforsu tanba jogadora PR Manuela Barreto (9) responde duni golu ida hodi hatur rezultadu ba 2-1.
Golu PR nian hanesan “bius” ba ekipa BCTL. Sira muda sira nia ritmu jogu hodi halo presaun maka’as ba ekipa PR iha kampu laran. Ho nune’e, iha minutu ikus jogadora Juvinia (7) hetan oportunidade hodi prodús tan golu ida hodi lori score sai ba 3-1.
Hosi golu ne’e mak termina jogu entre ekipa rua to’o árbitru huu apitu naruk hodi termina jogu no vitória monu ba BCTL.
Jornalista : Hortencio Sanchez
Editór : Francisco Simões
