Sobrevivente Masakre 12 Novembru, Hermínia de Deus. Imajen TATOLI/Osória Marques.

DILI, 09 novembru 2020 (TATOLI)–Sobrevivente masakre 12 Novembru 1991, Hermínia de Deus, iha inisiativa hodi hamosu divizaun saúde iha Comité 12 Novembru (C12N) hodi tau-matan ba maluk sobrevivente ne’ebé mak kondisaun la di’ak.

Notisia Relevante: HNGV koloka medíku 30-resin halo tratamentu saúde masal ba sobrevivente

“Daudaun ne’e, ha’u mai loke divizaun saúde iha Comité 12 Novembru nian ne’ebé mak tau-matan ba sobrevivente sira ne’ebé moras tanba ha’u hakarak kontribui ba nasaun doben Timor-Leste. Nune’e, ha’u husu ba Prezidente C12N, Grigório Saldanha, hodi loke tan divizaun saúde hodi ita bele ajuda malu,” Sobrevivente Hermínia de Deus hatete ba Agência TATOLI iha nia knaar fatin A eis Antigu Komarka Balide, Dili, foin lalais ne’e.

Nia hateten, divizaun ne’e reativa iha 2012 bainhira nia sei servisu iha Ajénsia Dezenvolvimentu Timor-Leste (ETDA, sigla inglés) ne’ebé sai hanesan formadora kona-ba saúde nian iha ne’ebá, hafoin para mak kontinua fali iha Comité 12 Novembru.

Tanba, tuir nia, iha tinan ne’e ema sobrevivente kuaze na’in-10 mate tanba moras. Tanba ne’e mak nia hakarak kontribui no ajuda maluk sobrevivente sira liuhosi estabelesementu divizaun saúde hodi kolabora hamutuk ho parte relevante hanesan Minitériu Saúde (MS) no Organizasaun Naun Governmentál PRADET.

Sobrevivente Masakre 12 Novembru, Hermínia de Deus. Imajen TATOLI/Osória Marques

“Ita la book-aan mak sira hanoin hein de’it destinu mate. Tanba sira mós sakrifika aan ba rai ida-ne’e, nune’e ha’u iha inisiativa no hanoin ida katak tenke ajuda malu. Se ami ho ami mak la ajuda malu entaun ho ema seluk ne’e sai oinsá. Ha’u sente triste tanba sira sakrifika sira-nia aan ba luta indenpendénsia depois moras no laiha kbiit atu moris no dala ruma sobrevivente balun moras ona maibé laiha uma ne’ebé mak seguru tanba ne’e ha’u iha hanoin hakarak hamosu divizaun ida iha Comité 12 Novembru hodi fasilita no motiva malu,” nia dehan.

Sobrevivente ne’ebé moras no laiha kbiit, nia dehan, presiza motivasaun no korajén nune’e sira mós bele iha korajén no forsa.

Nia hateten, Comité 12 Novembru laiha osan maibé komité hanoin fó motiva no karajén ba sira no lori sira ba ospitál hodi halo tratamentu ba sira-nia saúde.

“Bainhira maluk ne’ebé moras mentál, sei lori ba Pradet tanba Comité 12 Novembru iha ligasaun ho sira no mós Ministériu Saúde (MS),” nia infroma.

Nia hateten, kontribuisaun ba dezenvolvementu nasaun Timor-Leste nian la presiza tenke tuur ka pozisaun iha Governu mak fó kontribuisaun maibé bainhira iha abilidade no iha koñesementu bele fahe ba maluk sira.

Istória pasadu

Iha 12 novembru 1991 liuba ne’e, sobrevivente ne’e haktuir katak hakarak ka lakohi, bele ka labele, no mate ka moris tenke halo manifestasaun tanba militár Indonézia fó presaun maka’as.

“Iha momentu ne’ebá, ha’u rasik organiza kolega lubun ida iha UNTIM tanba militár Indonézia sira komesa fó presaun, entaun hakarak ka lakohi, bele ka labele no mate ka moris, ami buka espasu livre hodi halo manifestaun ne’e bainhira Sebastião Gomes nia ai-funan iha igreja Motael nian,” nia dehan.

Iha akontesementu masakre 12 novembru ema la koñese malu maibé ho hanoin ida no brani hasoru presaun Indonézia ho manifestaun ne’ebé mak organizadu tebes.

“Ita lahatene tuir ita-nia inimigu. Iha momentu ne’ebá, ita laiha telefone no buat la livre hanesan agora. Maibé ami iha hanoin ida katak tenke hetan independénsia entaun ami organiza malu hodi halo manifestasaun maske iha presaun nia-laran maibé ami brani no buka nafatin,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here