Prezidenti Komite 12 Novembru, Gregório Saldanha, Imajen/Antonio Goncalves.

DILI, 09 novembru 2020 (TATOLI)–Prezidente Comité 12 Novembru (C12N), Gregorio Saldanha, hateten tinan 29 (12 novembru 1991-12 novembru 2020) ona maibé sobrevivente trajedia 12 Novembru maiória seidauk servisu.

“Agora to’o ona tinan ba 29 maibé sobrevivente balu de’it maka servisu no maiória seidauk hetan servisu tanba servisu susar loos no ita-nia Governu seidauk kria kondisaun servisu. Servisu sira-ne’e hotu maihosi Governu. Ita koa’lia kona-ba servisu jerál iha Timor seidauk iha kondisaun di’ak atu ema hotu bele servisu,”  Prezidente Comité 12 Novembru (C12N), Gregorio Saldanha, hatete ba Agência TATOLI iha rezidénsia PATIFOR Motael, Dili, segunda ne’e.

Tanba ne’e, nia hatutan, timoroan barak ba buka servisu iha ema-nia rain ho razaun tanba servisu iha rai-laran laiha duni no Governu loke kampu servisu la to’o hodi akumula hotu timoroan sira. 

“Ita-nia lei tenke fó garantia ba ema estranjeiru hodi kria kondisaun ne’ebé di’ak nune’e ema estranjeiru sira  bele lori sira-nia osan mai investe iha Timor atu bele fó servisu ba maluk timoroan sira. Governu mak hamriik monu hela de’it hanesan ne’e, entaun ita la seguru. Tanba ida-ne’e presiza nesesidade no preokupasaun ita hotu nian. Buat sira-ne’e mak halo servisu laiha,” Prezidente C12N hateten.

Sobrevivente 12 Novembru, nia dehan, barak mak sofre ba servisu laiha ne’e no nusa mak sobrevivente sira bele fó han feen ho oan fó oan sira ba eskola, no oinsá mak bele hetan uma di’ak no goja independénsia ida-ne’e. 

Nia hateten, pelumenus nesesidade báziku ne’e bele atende moras ba halo tratamentu, oan sira eskola ho di’ak no bele hela iha uma di’ak. Buat sira-ne’e hotu tanba tempu agora moris atu dezenvolve maibé nafatin iha fatin tanba Governu iha mudansa polítika hela de’it no susar atu kria kampu traballu. 

Nia husu ba Governu presiza kria kondisaun para ema hotu bele hetan servisu no ema hotu bele kontente ho independénsia ida-ne’e, la’ós independénsia tinan 20 ona maibé povu moris nafatin iha susar nia-laran.

“Ami C12N presiza servisu no povo Timor tomak mós presiza servisu ida-ne’e sai hanesan responsabilidade ba ita hotu nian. Entaun, ha’u husu ba Governu presiza kria kondisaun para ema hotu bele hetan servisu no ema hotu bele kontente ho independénsia ne’e. Agora tinan 20 ona, ita sei susar nafatin ne’e. Iha Dili hanesan ne’e ona, iha foho aat liu tan,” Gregorio esplika. 

Tanba, tuir nia, objetivu hósi independénsia ne’e atu muda ema-nia vida no se independénsia ne’e la muda ema-nia vida entaun bele dehan independénsia halo  atu saida. 

To’o agora, nia dehan, sobrevivente balu sorte iha hodi servisu ONA iha parte Governu nian, balu mós servisu iha empreza públiku sira no barak mak laiha servisu iha uma de’it, halo  nusa maka sira bele tau-matan  ba sira-nia familia. 

“Iha Timor ne’e mezmu ita la servisu mós ita iha rai natón atu halo netik uma ida no ita bele kuda netik modo ruma hodi ba fa’an, atu nune’e bele auguenta ba moris ne’e. Maibe ida-ne’e la to’o tanba ita moris la’ós atu han no hemu de’it maibé ita mós presiza buat seluk,” nia dehan. 

Kona-ba pensaun, nia esplika, sira hetan pensaun hosi Governu la to’o tanba gasta ba uma-laran, hanesan tau-matan ba oan-nia eskola no feen moras tenke halo tratamentu hodi sosa aimoruk no hadi’a uma.

“Ita ukun-aan tinan 20 ona mós ita tarde dezenvolve ita-nia rain. La’ós ita-nia Governu mak laiha kapasidade, lae. Maibé ita-nia kondisaun mak la fó biban ba ita-nia Governu ukun no dala ruma membru Governu balu ladún ativu kapasitadu atu bele halo servisu ne’e. Governu ukun la hún la dikin de’it maibé troka fali membru Governu ne’ebé mak han malu la para, halo nusa maka ita bele la’o ba oin ho di’ak, se nune’e hela de’it,” Prezidente ne’e hateten.

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here