Sobrevivente masakre 12 Novembru ho nia família sira halo kontribuisaun finanseira hodi sosa materiál konstrusaun moru Semitériu Santa Crus. Imajen/Facebook: Nuno Saldanha.

DILI, 09 novembru 2020 (TATOLI)—Sobrevivente masakre 12 Novembru ho nia família sira halo kontribuisaun finanseira hodi sosa materiál konstrusaun moru Semitériu Santa Crus nian tanba Comite 12 Novembru (C12N) konisdera semitériu  Santa Crus hanesan fatin lulik ne’ebé joven barak fakar-raan no lakon vida.

Notísia Relevante: Juventude presiza hamutuk atu hateke ba futuru

Imajen/Facebook: Nuno Saldanha.

“Hanesan Timor-oan hakarak kontribui saida mak ita iha ka tuir ita-nia abilidade ne’ebé kada C12N iha. Nune’e horisehik ami hamutuk ho família boot C12N nian tau osan hamutuk hodi sosa rai-henek, fatuk no batako hodi hadi’a moru Santa Crus nian. Tanba iha tinan kotuk udan boot hodi hamonu tiha moru maibé to’o agora Governu la hadi’a entaun ami C12N iha inisiativa hodi reabilita fali moru tanba fatin ne’e fatin lulik ne’ebé mak lori Timor ba mundu,” Gregorio Saldanha hatete ba Agência TATOLi iha edifisiu PATIFOR Motael, Dili, segunda ne’e.

Molok sobrevivente hadi’a moru Santa Krus, Prezidente C12N haktuir, sobrevivente sira fó koñesementu ba Administradór no Prezidente Autoridade Munisípiu Dili liuhosi telefonika.

Imajen/Facebook: Nuno Saldanha.

“Ami ba halo moru ne’e ema balu hirus tan ami. Sira hanoin katak  projetu Governu nian. Prosesu hadi’a moru ne’e foin hahú horisehik. Ami la hato’o proposta ba Governu tanba Governu osan laiha. Ida-ne’e ami hasai rasik ami-nia osan depois mak ami fó koñesimentu ba administradór no Prezidente Munisípiu Dili liuhosi telefone de’it. Ne’ebé, Prezidente Autoridade Munisípiu Dili konkorda entaun ami halo kedan servisu. Ami nafatin iha obrigasaun atu halo ida-ne’e tanba uluk ne’e mós laiha ema ida maka obriga ami halo manifestasaun,” nia dehan.

Nia informa, sobrevivente ho nia-oan sira mak hala’o servisu ida-ne’e no hetan apoiu hosi jerasaun 12 de Novenbru sira. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here