Prezidente Parlamentu Nasionál, Aniceto Longuinhos Guterres Lopes. Imajen TATOLI/Egas Cristovão

DILI, 09 novembru 2020 (TATOLI)–Prezidente Parlamentu Nasionál (PPN), Aniceto Guterres, informa sekuénsia diskusaun Orsamentu Jerál Estadu (OJE) 2021 ba Prezidente Repúblika (PR), Francisco Guterres ‘Lú Olo’, durante audiénsia semanál.

“Audiénsia hanesan baibain, ohin ha’u mai hato’o informasaun kona-ba prosesu orsamentu iha Parlamentu Nasionál (PN) ne’ebé mak la’o daudaun. Presiza mós atu hato’o informasaun no tenke koordena tanba ne’e liga ho kalendáriu Estadu, liuliu bainhira mak orsamentu bele  hetan aprovasaun no Prezidente Repúbika iha loron 30 atu promulga,” PPN hateten hafoin audiénsia ho Xefe Estadu iha Palásiu Prezidensiál, Bairro Pité, segunda ne’e.

Nia esplika, bainhira prosesu orsamentu 2021 la la’o tuir ninia prazu ne’ebé determina ona no la promulga karik bele implika orsamentu duodésimu, tanba ne’e presiza iha koordenasaun no partilla informasaun entre órgaun soberania sira hodi bele tetu no enkuadra didi’ak iha kalendáriu Estadu. 

“Kona-ba Parlamentu, prosesu tuir rejimentu no kalendáriu hotu-hotu konkorda ona. Daudaun iha faze audiénsia públika, tanba proposta OJE 2021 tama ona iha loron 15 outubru, maibé iha atrazu oituan kuaze semana rua iha fornesimentu informasaun ho dokumentu nesesáriu ba proposta orsamentu, ne’ebé foin mak tama iha loron 29 outubru,” nia akresenta.

Tuir Rejimentu Parlamentu Nasionál (RPN), orsamentu ne’e ho ninia prazu loron 20 ba komisaun espesializada,  liuliu Komisaun C (Finansa Públika) ne’ebé sura hosi loron 30 outubru.

“Entaun iha kalendáriu globál ida-ne’e, audiénsia públika hahú ona iha loron 06 novembru no sei ramata iha loron 17 fulan ne’e. Loron 23 novembru, komisaun hotu tenke submete ona relatóriu ka pareser setoriál ba Komisaun C no komisaun iha tempu loron hitu atu elabora relatóriu pareser ida atubele eprezenta iha plenária,” Aniceto subliña. 

Diskusaun espesialidade proposta OJE 2021 iha 01 dezembru

Tuir planu, PN sei hahú debate faze jeneralidade iha loron 01 dezembru tuir kalendáriu ne’ebé mak iha tiha ona. 

Iha loron 18 novembru audiénsia públika ramata no sei iha konferénsia líder bankada sira atu define kalendáriu sira tuir mai. 

“Nu’udár Prezidente Parlamentu, ha’u garante de’it ninia prosesu la’o tuir dalan. Kona-ba susbstánsia ne’e kabe ba deputadu sira, tanba sira mak hola desizaun atu pasa ka la pasa,”  PPN hatutan.

Durante audiénsia semanál, ko’alia mós kona-ba efisiénsia no efikásia PN iha jestaun administrasaun ne’ebé afeta mós ba produtividade deputadu sira, ne’ebé tuir knaar hanesan órgaun lejizlativa no órgaun fiskalizadór. 

“Hanesan Prezidente Parlamentu, uluk ha’u adianta ona katak hahú hosi loron 19 maiu, bainhira ha’u asume knaar ho prioridade atu garante funsionamentu normál Parlamentu no realidade hatudu katak agora funsionamentu la’o di’ak ona, OJE ida aprova tiha ona, no ida tan iha hela prosesu,” nia fó hanoin.

Jornalista: Cipriano Colo

Editora: Júlia Chatarina

HAKEREK NO HATÁN

Please enter your comment!
Please enter your name here