Ministru Koordenadór Asuntu Ekonómiku, Joaquim Amaral. Imajen Tatoli/Egas Cristovão

DILI, 09 novembru 2020 (TATOLI)–Ministériu Koodenadór Asuntu Ekonómiku (MKAE) propoin $2.117.078 iha Orsamentu Jerál Estadu (OJE) tinan fiskál 2021, ne’ebé fahe ba kategoria sálariu no vensimentu $160.572, Bens no Servisu $1.374.256, kapitál menór $132.250 no tranferénsia públika $450.000.

“MKAE koordena atu iha tinan 2021 hakarak diversifika ekonomia, formasaun rekursu umanu, halo atividade natureza permanente inklui promove boa governasaun no jestaun institusionál.  Tanba ne’e, ami propoin millaun $2-resin no ami mós simu planu rekoperasaun ekonómika hamutuk $340.000,” Ministru Koordenadór Asuntu Ekonómiku, Joaquim Amaral esplika hafoin audiénsia públika konjunta iha sala plenáriu, Parlamentu Nasionál (PN), segunda ne’e. 

Kona-ba subsídiu rekoperasaun ekonómika, governante ne’e hateten osan $340.000 atu apoia atividade ekonomia ki’ik sira hosi mikro kréditu ba haki’ak karau susu been no produsaun na’an iha merkadu.

“Ami haree inisiativa di’ak atu suporta osan oituan  ba mikro empreza, hodi hasa’e produsaun iha merkadu liuhosi rekoperasaun ekonómika iha tinan oin,” ministru ne’e akresenta.

Mekanizmu kréditu, tuir governante ne’e depende ba volume pedidu tanba empreza tenke halo atividade no produsaun maka foin bele asesu ba  kréditu. 

“Tanba MKAE atu foti osan hodi hakiak no sira-nia produsaun bele tama fali bá merkadu. Ida-ne’e mak ita hakarak kontinua no estende,”  Joaquim  subliña.

Sorin seluk, nia garante katak orsamentu ne’e sufisiente atubele hala’o atividade diversifika ekonomia iha Timor-Leste, tanba sei serbisu hamutuk ho ajénsia ekonomia sira inklui Kámara, Komérsiu no Indústria Timor-Leste (CCI-TL, sígla portugés).

Entretantu, tuir dekretu-lei númeru 14/2018, loron 17 agostu, MKAE hanesan ministériu atu koordena atividade membru Governu ne’ebé iha kompeténsia ba asuntu ekonómiku, dezenvolvimentu, setór privadu no kooperativa traballu, formasaun profisionál no ambiente. 

 Jornalista: Florêncio Miranda Ximenes

Editora: Júlia Chatarina

HAKEREK NO HATÁN

Please enter your comment!
Please enter your name here