Osan Dollar Amerikanu. Imajen/Espesiál

DILI, 09 novembru 2020 (TATOLI)—Ministériu Saúde (MS) prevee ona Orsamentu Jerál Estadu (OJE) 2021 hamutuk millaun $58.847.506  hodi ezekuta ba kategoria lima mak hanesan saláriu vensimentu, bens servisu, kapitál menór, kapitál dezenvolvimentu no transferénsia públika.

“Orsamentu Jerál Estadu 2021 hamutuk $58.847.506 ba kategoria lima mak hanesan salariu vensimentu $23.928.890, bens servisu $17.616.256, kapitál menór $1.920.256, kapitál dezenvolvimentu $3.750.104  no transferénsia públika $11.632.000,” dehan Ministra Saúde, Odete Maria Freitas Belo, ba jornalista sira iha Parlamentu Nasionál hafoin halo audensia públika ho Deputadu Komisaun F, segunda ne’e.

Notísia Relevante:OJE 2020 ba MS hamutuk millaun $ 42.716

Ba 2021, Governante ne’e dehan sei kontinua konsentra ba hadi’a prestasaun saude liliu programa kuidadu saúde primária, sekundária hahú kedas husi Postu Saúde, Sentru Saúde, Ospitál Referál to’o Ospitál Nasionál Guido Valadares Dili.

”2021 ita sei hadi’a fila fali kondisaun ospitál referál sira, sentru saúde, postu saúde no ita mós haree ba profisionál saúde ne’ebé mak presiza atu halo rekrutamentu tanba iha postu saúde, sentru saúde,  profisionál saúde sira nafatin menus,” dehan Odete.

Aleinde ne’e sei kontinua implementa mós programa saúde iha família hodi lori atendimentu saúde hakbesik liután ba to’o komunidade sira-nia hela fatin. No mós programa rekuperasaun ekonómika iha área saúde nian.

”Atividade Saúde iha família mós kontinua la’o nafatin ba kada uma-kain sira hakbesik nafatin ba komunidade sira no ami lori servisu ne’e hakbesik liután ba komunidade sira para bele minimiza sira-nia osan iha sira nia bolsu ida ne’e mak ami nia komprensaun kona-ba pakote rekuperasaun ekonomika entaun ami aloka orsamentu hamutuk Miliaun 12,” informa Ministra Saúde.

Notísia Relevante:MS Redús Orsamentu Millaun Tolu Iha OJE 2020

Joralista :Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here