Xefe Departamentu Abastesimentu Água Munisípiu Dili, Francisco Xavier Pereira. Imajen TATOLI/Osória Marques.

DILI, 09 novembru 2020 (TATOLI)–Xefe Departamentu Abastesimentu Água Munisípiu Dili, Francisco Xavier Pereira, hateten durante ne’e komsumidór bee urbana 30% de’it mak selu taxa ba Governu maiória la selu tanba bee ladun iha tekanan (presaun) ne’ebé mak bele nesesita sira-nia nesesidade loron-loron nian.

Notísia Relevante: Populasaun Dare-Fatuahi seidauk asesu liña transmisaun kanu bee-moos DNSA

“Ita-nia populasaun ne’ebé mak uza liña transmisaun bee Diresaun Nasionál Servisu Água maiória mak seidauk selu taxa ba Governu no maizumenus 30% de’it mak foin selu taxa ba Governu,” Xefe Departamentu Abastesimentu Água Munisípiu Dili, Francisco Xavier Pereira, informa ba jornalista Agência TATOLI iha nia knar fatin Caicoli, Dili, foin lalais ne’e.

Nia haktuir, haktuir Governu sei oferese bee ne’ebé ho kualidade no kuantidade ba populasaun sira iha área urbana nian para futuru populasaun mós hanoin oinsá bele selu taxa ba Governu.

“Ami sei esforsu atu bele hadi’a sistema ne’e di’ak liután nune’e bee bele iha kualidade ho kuantidade hodi fornese ba populasaun iha Kapitál Dili laran, outamatikamente bainhira bee ho pressaun ne’ebé di’ak no kualidade entaun komunidade hotu-hotu hakarak selu,” na dehan.

Tuir nia, sei halo sensibilizasaun ba komunidade sira atu nune’e sira mós bele komprende oinsá atu bele kuidadu bee labele estraga no uza bee tuir sira-nia nesesidade para komunidade hotu hotu bele asesu ba bee.

“Estraga bee no bee lakon iha dalan-dalan ne’e tanba komunidade barak maka la kuidadu no halo ku’ak kanu iha dalan-dalan no mós halo konesaun ilegál ho ida-ne’e ita bele dehan katak komunidade ne’ebé uza  bee ne’e la selu barak liu duké selu,” nia hateten. 

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here