Kargu xefia na’in-ualu hosi Ministériu Defeza hala’o juramentu hodi simu pose iha salaun enkontru, Ministériu Defeza, Fatuhada, Dili, 09 novembru 2020. Imajen Tatoli/Eugénio Pereira

DILI, 09 novembru 2020 (TATOLI) – Ministru Defeza, Filomeno da Paixão de Jesus, akompaña hosi Komisáriu Komisaun Funsaun Públika (CFP) ba Portafóliu Planeamentu Forsa Traballu no Avaliasaun Dezempeñu Formasaun no Dezenvolvimentu, António Freitas, ohin,  fó pose ba kargu xefia na’in-ualu hosi Ministériu Defeza nian.

Enposadu sira-ne’e simu pose tuir nota 76/DNFTMFP 7 setembru 2020 ne’ebé prienxe rekizitu hosi rezultadu selesaun por méritu iha Ministériu Defeza ne’ebé aprova ona hosi Prezidente Komisaun Funsaun Públika, Faustino Cardoso Gomes, loron 18 setembru 2020.

Kargu xefia na’in-ualu hosi Ministériu Defeza hala’o juramentu hodi simu pose iha salaun enkontru, Ministériu Defeza, Fatuhada, Dili, 09 novembru 2020. Imajen Tatoli/Eugénio Pereira

Enposadu sira ne’ebé simu pose liuhosi termu juramentu ne’e asiste hosi Padre Vigáriu Igreja Parókia Balide, Venceslau Thomás de Deus, akompaña hosi Ministru Defeza, Filomeno de Jesus da Paixão no Komisáriu Komisaun Funsaun Públika, António Freitas.

Enposadu ho mandatu tinan haat-ne’e kompostu hosi  Tékniku Superiór  grau B, Francisco Ribeiro Brites asume kargu Diretór Nasionál Rekursu Umanu, Tékniku Profisionál Grau C, Lídia Pires  ba Diretora Nasionál Polítika Defeza, Tékniku Profisionál grau C Fortunato Domingos Ximenes ba kargu Diretór Nasionál Kooperasaun Internasionál, Tékniku Profisionál grau C, Martinho Soares Moniz asume kargu Diretór Nasionál Administrasaun Finansas, Tékniku Administrasaun grau A, Francisco Amaral da Silva, assume kargu Xefe Gabinete Jurídiku, Tékniku Profisionál grau C Amaro Camões Mau Loco assume kargu Diretór Jestaun Patrimóniu, Tékniku Superiór, Justino Folomeno da Costa Martins assume kargu Diretór Nasionál Aprovizionamentu no  Tékniku Profisionál grau C, Dilia Helena Auxiliadora Sousa ba kargu Sub-Inspetora.

Ministru Filemeno hosu ba enposadu sira atu uza konfiansa ne’ebé governu fó bele servisu ho dixiplina ho profisionál atu kontribui ba governasaun di’ak iha Ministériu Defeza.

Nia dehan, iha ministériu defeza, knaar Diretór Nasionál Polítika Defeza, no Diretór Nasionál Kooperasaun Internasionál hala’o servisu maka’as tebes hodi liga kooperasaun servisu ministériu defeza no belun sira hodi rai li’ur.

“Ha’u hato’o parabéns ba imi, tanba servisu iha servisu ida Kooperasaun Internasionál no Polítika Defeza ne’e importante tebes, tanba imi tenke aprende beibeik labele moe atu husu informasaun kona-ba polítika kooperasaun internasionál hodi ita halo servisu la’o di’ak liután,” Ministru Filomeno hateten iha nia liu hosi diskursu.

Iha área lojístika nian, Ministru Filomeno husu kargu xefia no funsionáriu sira uza karreta estadu tenke kuidadu hodi poupa no halo manutensaun di’ak liu.

“Ha’u husu imi tenke kuidadu ita nia karreta sira para labele estraga karreta hodi tula fali buat oin-oin,” nia hateten.

Ministru mós husu atu ekipa sira ne’ebé servisu iha área aprovizionamentu Ministériu Defeza nian bainhira hala’o servisu ruma tenke rigór atu hadi’a prosesu dokumentu sira ne’ebé liga ho administrasaun servisu no prosesu pagamentu ba projetu no konkursu públiku ruma tenke verifika didi’ak.

“Ha’u haree aprovizionamentu ladún kria kooperasaun di’ak iha gabinete jurídiku, tanba agora ne’e lei korrupsaun sai ona, keta halo ita para hotu iha ne’ebá, tanba ne’e ita hotu- hotu tenke kuidadu didi’ak,” nia apela.

Iha fatin hanesan, Komisáriu KCF, António Freitas hato’o parabéns ba enposadu sira atu apoiu servisu lori Ministériu Defeza susesu iha nia servisu tomak.

“Kargu xefia sira no funsionáriu públiku sira iha área rua maka ha’u haree importante tebes, ida maka polítika defeza no ida maka kooperasaun internasionál. Asuntu rua lori servisu hanesan naha todan ida tenke hetan suporta hosi ministru no kargu xefia sira,” nia hateten.

António dezafia enposadu sira atu kontinua hadi’a sira nia polítika servisu no kria kooperasaun servisu hodi fó onra ba servisu sira kontribui ba governu Timor-Leste.

“Ha’u dezafia imi atu uza didi’ak imi nia kargu ne’ebé iha, servisu didi’ak no koopera malu atu labele lakon konfiansa hosi ministru no imi nia diretór sira,” António apela.

Nia dehan, CFP sei koordena nafatin ho Ministru Defeza hodi buka meius fó pose kargu xefia balun ne’ebé sei mamuk.

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here