DILI, 09 novembru 2020 (TATOLI) – Ekipa jogadór hosi Agência Noticiosa de Timor-Leste, TATOLI.IP, ohin loraik, tenke “sofre” hasoru nia adversáriu Grupo Media Nacional (GMN) ho golu 0-7.
Iha jogu ne’ebé nakonu ho apresiasaun hosi adeptu ekipa rua nian, fó inspirasaun boot ba parte-rua halo kontra atake iha minutu primeira parte nian. Maibé, “Dewi Fortuna” pertense liubá GMN hodi fó espíritu ba jogadór Jovial Santa (7) halo hat-trick (prodús golu tolu) durante jogu primeira parte.
Hakat ba segunda parte TATOLI halo esforsu atu duni tuir derrota ne’ebé ekipa enfrenta, maibé la konsege halo golu tanba ekipa GMN halo defensivu maka’as no halo jogadór sira TATOLI nian “iis kuaze halai sala hotu”.
Haree ba parte TATOLI nian leet maka’as la kontrola ho diak, jogadór GMN Moises Soares (11) uza kedan oportunidade hodi hatama golu 2 tuituir malu hodi hatuur rezultadu ba 5-0.
La’ós ne’e de’it, Silvestre Castro (9) mós hetan oportunidade bainhira bola barullu iha rede TATOLI nia oin hodi lansa tan golu ida hodi lori rezultadu ba 6-0. Nune’e, liu de’it minutu balun, Silvestre les tan golu ida hodi lori rezultadu tur metin iha 7-0.
Maski TATOLI tenta halo kontra no atake maka’as, maibé esforsu hirak ne’e hela de’it hanesan esforsu, tanba to’o minutu ikus árbitru huu apita naruk hodi termina jogu laiha golu ruma mak TATOLI prodús.
Jornalista : Hortencio Sanchez
Editór : Francisco Simões
