Komisáriu Komisaun Funsaun Públika ba Portafóliu Planeamentu Forsa Traballu no Avaliasaun Dezempeñu Formasaun no Dezenvolvimentu, António Freitas. Imajen/TATOLI

DILI, 09 novembru 2020 (TATOLI) – Komisáriu Komisaun Funsaun Públika (CFP, sigla portugés) ba Portafóliu Planeamentu Forsa Traballu no Avaliasaun Dezempeñu Formasaun no Dezenvolvimentu, António Freitas, informa sira-nia parte aprezenta ona proposta subsídiu alimentár no transporte ba Ministériu Finansa (MF).

“Tinan kotuk CFP aprezenta ona proposta subsídiu transporte no alimentár ba ministériu finansa no depende ministériu finansa bele realiza kondisoens hirak ne’e ba ita nia funsionáriu públiku”, Komisáriu António  Freitas, ba Agência Tatoli, ohin, iha edifísiu Ministériu Defeza, Fatuhada Dili.

António dehan, VIII Governu Konstitusionál ne’ebé lidera hosi Primeiru-Ministru, Taur Matan Ruak, iha polítika di’ak hakarak fó subsídiu ba funsionáriu públiku hodi neutraliza servisu entre diretór ka kargu xefia no funsionáriu sira bele fó kontribuisaun servisu di’ak liután ba Estadu.

Razaun seluk tan maka, governu hakarak halo poupansa no minimiza labele kargu xefia sira  ne’ebé uza karreta Estadu de’it mak iha direitu uza kupon mina Estadu nian, maibé funsionáriu baibain mós bele hetan direitu  hanesan, mezmu sira uza motór privadu.

“Ita hakarak fó tratamentu ne’ebé justu no iguál”, tenik nia.

Kona-ba kritériu atu fó subsídiu, parte komisaun ho tékniku sira sei define ninia regra no regulamentu iha kada instituisaun Estadu no liña ministeriál sira hotu.

Jornalista: Eugénio Pereira

Editór: Francisco Simões

2 KOMENTÁRIU

  1. Fungsionario Publico laos hotu2 iha kareta no motor. Ba sira be iha transporte ne diak ona be sira be sae bemo no taxi nee mos heta ga lae? Subsidio alimentar precisa duni no mos subsidio ba fen laen no oan mos precisa. Hein katak ita boot sira tetu didiak mos ba ida nee.

HAKEREK NO HATÁN

Please enter your comment!
Please enter your name here