Produtu Cesta Bázika. Imajen TATOLI/Antónia Gusmão

DILI, 09 novembru 2020 (TATOLI)—Ministru Koordenadór Asuntu Ekonómiku, Joaquim Amaral, informa iha fulan-novembru nia laran Governu sei fahe voucher Cesta Bázika ba komunidade iha kapitál Dili hodi troka iha loja ne’ebé identifika ona.

Voucher Cesta Bázika sei implementa iha meadu novembru no Ministériu Turizmu, Komérsiu no Indústria mak sei responsável no introdúz iha Dili no sentru urbanu 12, atu loja sira ne’ebé preparadu no prontu bele uza sistema voucher,” Ministru Joaquim informa iha resintu Parlamentu Nasionál, segunda ne’e.

Notísia Relevante: MTKI identifika loja 10 troka voucher Cesta Bázika iha Dili

Governante ne’e dehan, loja sira ne’ebé Governu kontrata atu implementa voucher tenke iha kondisaun armajen atu rai produtu lokál kleur no fresku.

“Nune’e, ita-nia komunidade sira ne’ebé hela iha área urbana iha oportunidade hili ai-han sira ne’ebé iha loja ho flesibilidade,” nia akresenta.

Nia rekoñese kondisaun lojístika nasionál ladún permite, maibé Governu sei uza meiu hotu atu populasaun tomak bele hetan direitu ba programa Governu iha ámbitu rekuperasaun ekonómika tuir lei haruka.

Dadus totál populasaun ne’ebé Ministériu Administrasaun Estatál (MAE) aprezenta ona ba Ministériu Koordenadór Asuntu Ekonómiku (MKAE) hamutuk millaun 1,5.

“Númeru ne’e ita haree filafali ba númeru antes bainhira aprova orsamentu ba Cesta Bázika ne’e ho baze totál populasaun millaun 1,3. Ho situasaun ne’e ita husu ajuda ba autoridade lokál sira atu rejistu dadus ne’ebé loos no naran labele aumenta derepente hodi labele atraza programa ne’e,” nia subliña.

Alende ne’e, Ministru Joaquim husu ba kompañia sira ne’ebé distribui produtu, tenke kumpre volume montante tuir lei katak $25 ba kada sidadaun.

“Ita hotu hakarak transparánsia no sira ne’ebé hetan fiar tenke kumpre valór atu ita hotu nia kooperasaun iha programa ne’e la’o ho susesu,” nia akresenta.

Antes ne’e, MTKI identifika ona loja 10 atu troka voucher ba produtu.

Totál populasaun iha Dili hamutuk 340.000.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here