Komisáriu Komisaun Funsaun Públiku, António Freitas. Imajen Tatoli/ António Gonçalves

DILI, 09 novembru 2020 (TATOLI)-Komisáriu Komisaun Funsaun Públika (CFP, sigla portugés) ne’ebé responsabiliza ba portefólio iha prosesu disiplinár, António Freitas, hatete ninia parte sei hamutuk ho Ekipa Fiskalizasaun Konjunta (EFK) hodi haree asuntu uzu veikulu Estadu hodi armonia iha ninia lala’ok no implementasaun.

“Ami Ekipa Fiskalizasaun Konjunta (EFK) sei tuur hamutuk fila fali para haree, permite ka lae funsionáriu uza karreta tula oan ba eskola, tanba ha’u haree ne’e komentáriu CAC nian mak dehan proibidu utiliza viatura Estadu”, katak nia hodi hatan ba jornalista iha Ministériu Defeza, Fatuhada, ohin.

Nia haktuir EFK kompostu hosi Polísia Nasionál Timor-Leste (PNTL), Diresaun Nasionál Transporte no Terrestre (DNTT), Ministériu Finansa, Dirasaun Patrimóniu Estadu no Komisaun Anti Korrupsaun (CAC, sigla portugés).

António Freitas hatutan deklarasaun sobre dekretu lei númeru 8/2003, 18 juñu 2003, artigu 3 alinea 1 hosi Adjuntu Komisáriu CAC ba asuntu Prevensaun no Sensibilizasaun, Luis de Oliveira Sampaio, la’ós komentáriu CFP.

Não é komentáriu CFP, tanba ami seidauk deklara buat ruma, tanba ne’e ami ekipa sei armoniza situasaun sira ne’e iha terrenu, liu-liu iha faze operasaun sira, tanba kondisaun balun permite funsionáriu bele tula oan ba eskola, ha’u hatene klaru  dekretu lei nú 08/2003”, akresenta Komisáriu António.

Tuir nia funsionáriu sira iha tempu dadeer atu ba servisu aproveita tula mós oan ba eskola no iha tempu meudia nu’udar tempu deskansa sira bele fila ba uma aproveita hasoru mós oan sira iha eskola.

Nu’udar dirijente ida hosi CFP, António afirma funsionáriu sira bele uza karreta Estadu tula oan sira ba eskola, importante liu maka funsionáriu labele lori fali karreta Estadu ba partisipa festa, lia-mate no ba pasa ferias iha tempu finadu.

“Ha’u enkoraja funsionáriu públiku sira nafatin aplika situasaun ne’e ho normál, kuandu iha terrenu operasionál nian maka ema detein, hanesan kargu superiór másimu iha funsaun públika, ami tenke haree, tanba la’ós la permite totál labele uza, lae. Maibé permite iha tempu kondisionál. Se tula fali ba hola modo, tula sosa ai-sunu, tula halo lia, ne’e labele”, nia afirma tan.

Notísia Relevante : EFK sei manda karta xamada ba membru Governu uza patrimóniu Estadu iha finadu

Adjuntu Komisariu CAC ba asuntu Prevensaun no Sensibilizasaun, Luis de Oliveira Sampaio. Imajen Tatoli/Egas Cristovão

Iha deklarasaun foin lalais ne’e, Adjuntu Komisáriu CAC ba asuntu Prevensaun no Sensibilizasaun, Luis Oliveira Sampaio, alerta dekretu lei nú 08/2003 art. 3, alínea 1 hatete veíkulu Estadu uza de’it ba Fins Eskluzivamente Profisionál, tan ne’e la permite atu uza viatura Estadu nian hodi tula oan ba eskola.

Antes ne’e mós  Komisáriu CAC, Sergio Hornai, dehan lei la permite atu membru governu, deputadu no funsionáriu utiliza karreta iha tempu feriadu.

Komísariu CAC, Sergio Hornai. Imajen/Egas Cristóvão

“Membru governu iha lei hateten sira iha priviléjiu. Ha’u komisáriu CAC mós iha, maibé ha’u labele uza karreta CAC nian ba para iha tasi-ibun, ba halo festa, lia-mate ho lia-moris”, nia hateten.

Sergio dehan, bainhira ema uza karreta Estadu ba asuntu festa, lia-mate ho lia-moris nu’udar asuntu partikulár mak membru Governu, Deputadu no jerente seniór instituisaun públiku sira ne’ebé hetan priviléjiu uza karreta Estadu tenke tuir regra no prosedimentu uza patrimóniu Estadu hirak ne’e ho onestidade, responsabilidade no transparente.

Dekretu lei númeru 8/2003, 18 juñu 2003, artigu 3 alinea 1) hatete veikulu Estadu uza de’it iha tempu servisu (Os veículos do Estadu serão usados para fins exclusivamente profissionais).

Alinea 2; Utilizasaun veikulu iha tempu servisu mak loron segunda to’o sesta, hosi tuku 7.00 to’o 19.00 (Entende­se como período normal de utilização do veículo o período entre as 7 e as 19 horas, de Segunda a sexta-­feira).

Alinea 3; Veikulu Estadu ne’ebé la uza iha tempu servisu, para iha servisu fatin, eseptu haktuir iha númeru tuir mai (Durante os horários excluídos do período normal de utilização, deverão os veículos do Estadu ficar estacionados no parque do respectivo serviço, salvo o disposto nos números seguintes).

Jornalista: Eugénio Pereira

Editór: Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here