Presidente CCI-TL, Oscar Lima. Imajen TATOLI/Egas Cristovão

DILI, 09 novembru 2020 (TATOLI)—Kámara Komérsiu no Indústria Timor-Leste (CCI-TL, sigla portuges) apresia programa Cesta Bázika, ne’ebé dezeña hosi VIII Governu Konstitusionál tanba bele benefisia emprezáriu no populasaun sira iha ámbitu rekuperasaun ekonómika kurtu prazu.

Prezidente CCI-TL, Oscar Lima, nota katak iha tinan ne’e Governu ho esforsu no inisiativa lubuk ida konsege impede surtu COVID-19 hodi la hamate sidadaun, maski afeta ba ekonomia rai-laran tanba atividade barak maka paradu, maibé ezekutivu sira halo medida hodi normaliza hikas atividade ekonómika.

“Ami konsidera programa Cesta Bázika asuntu di’ak ida maski ita foin komesa, maibé ho esperansa katak rezultadu iha ba setór privadu no povu.  Tanba osan mós namkari oituan iha povu nia le’et,” Prezidente CCI-TL hateten bainhira akompaña Governu halo audiénsia públika konjunta iha plenária, Parlamentu Nasionál (PN), segunda ne’e.

Maski tuir emprezáriu timor-oan ne’e programa Cesta Bázika la’ós fásil tanba envolve entidade barak, maibé setór privadu sira hahú halo serbisu hamutuk ho Ministériu Koordenadór Asuntu Ekonómiku (MKAE) hodi halo identifikasaun ba produtu lokál sira iha rai-laran.

“Ami hahú organiza kolega emprezáriu sira iha terrenu no nota katak programa ne’e presiza tempu naruk oituan, tanba problema produtu lokál mak sei mínimu no bainhira halo levantamentu haree katak karik sei la to’o, maibé ita sei bele rezolve,” nia akresenta.

Notísia Relevante: Governu ofisialmente halo lansamentu nasionál programa Cesta Bázika

Oscar Lima dehan, Kámara Komérsiu organiza ona emprezáriu sira atu fó apoia másimu ba programa Cesta Bázika ne’e to’o susesu.

Maibé iha sorin seluk, nia rekomenda iha OJE 2021 presiza iha investimentu iha setór produtivu iha rai-laran.

“Ami husu atu Governu no deputadu sira investe maka’as iha área infraestutura no agrikultura, atu garante seguransa alimentár iha situasaun saida de’it,” nia fó hanoin.

Konsellu Ministru aprova diploma ne’e iha 23 setembru 2020 iha ámbitu planu eekuperasaun ekonómika tuir rezolusaun Governu númeru 28/2020, loron 19 agostu.

Entertantu,  iha tersa (27/10) Governu halo ona lansamentu nasionál ba programa Cesta Bázika no daudaun ne’e Ministériu Turizmu, Komérsiu no Indústria (MTKI) indika ona loja 10 atu fasilita komunidade iha munisípiu Dili hodi bele troka voucher ho produtu.

Programa ne’e kompoin hosi ai-han esensiál no produtu ijiene ka voucher, ne’ebé korresponde ho valór sasán.

Benefisiáriu ba programa ne’e maka membru uma-kain ne’ebé rejista ona iha ‘Livru Rejistu Uma Kain’ to’o loron 11 maiu 2020.

Cesta Bázika sei fahe per kapita ho valór $25 ba membru idaidak iha uma-kain ba kada fulan, durante fulan-rua.

Implementasaun medida apoiu ba família sei lidera hosi MKAE, ne’ebé koopera ho servisu públiku relevante no setór privadu.

Ministériu Saúde (MS) sei halo validasaun ba lista produtu atu hatene ninia nutrisaun no sanitáriu hosi kada produtu ai-han, enkuantu Ministériu Administrasaun Estatál (MAE) sei serbisu hamutuk ho autoridade no administrasun munisipál no suku, ba elaborasaun lista xefe família no númeru totál membru uma-kain ne’ebé sei sai benefisiáriu no organiza ninia distribuisaun.

Ministériu solidariedade sosiál no inkluzaun (MSSI) disponibiliza rede nasionál no sentru solidariedade sosiál iha munisípiu hodi fó apoiu tomak iha prosesu distribuisaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here