Ekipa IPG no ANPM, akompaña hosi membru PNTL, Komandu Polisía Covalima, haree fatin hetan fali mina, iha suku Debos, segunda (09/11). Imajen TATOLI/Antónia Gusmão

COVALIMA, 09 novembru 2020 (TATOLI)–Cidálio da Costa, abitante suku Debos, postu administrativu Suai, munisípiu Covalima, bainhira fura bee hetan mina.

“Ha’u fura bee atu loke fatin fase karreta no motor maibé foin to’o de’it metru 27 hetan ona mina, ho ida-ne’e obriga-an nafatin fura entaun ahi lakan sa’e no ha’u deside para kedas to’o de’it agora hodi hein Institutu Petróleu no JeoIojia (IPG, sigla portugés) no Autoridade Nasionál Petróleu no Minerál (ANPM) bele mai haree,” Cidálio da Costa konta tuir iha suku Debos, segunda ne’e.

Ho akontesimentu ne’e, nia parte informa ba autoridade seguransa no autoridade kompetente hanesan Ministériu Petróleu no Minerál (MPM), ANPM, IPG, no Timor Gás no Petróleu, Empreza Públika (Timor GAP, EP) iha ámbitu vizita iha munisípiu Covalima.

Nune’e, entidade kompetente deside hamutuk ho autoridade seguransa hodi ba diretamente iha fatin akontesementu no bainhira to’o iha terrenu, ekipa IPG no ANPM rekolla kedas informasaun hosi komunidade.

Hafoin realiza atividade, ekipa tékniku husu ba komunidade atu labele taka rai kuak área fura bee tanba ekipa sei foti amostra hodi halo análize iha laboratóriu.

“Ami sei buka tempu hodi mai foti amostra hodi analiza,” Prezidente IPG, Gabriel Gaspar Aparício de Oliveira dehan.

Enkuantu, amostra sira ne’ebé IPG durante ne’e foti sei lori ba halo analiza iha laboratóriu Ministériu Saúde ho duransaun tempu semana ida no kuandu hetan orgániku ruma sei manda ba analiza iha laboratóriu iha Canadá.

Jornalista: Antónia Gusmão

Editora: Julia Chatarina 

1 KOMENTÁRIU

HAKEREK NO HATÁN

Please enter your comment!
Please enter your name here