Ministru Petróleu no Minerál, Victor da Conceição Soares ho nia komitiva vizita auto estrada iha Covalima ne'ebé hetan estraga hosi natureza. Imajen Tatoli/Antónia Maia Gusmão

COVALIMA, 08 novembru 2020 (TATOLI)–Domingu ne’e, Ministru Petróleu no Minerál (MPM), Victor da Conceição Soares hamutuk ho delegasaun hala’o vizita dahuluk ba Munisípiu Covalima hafoin simu knaar nu’udar membru Governu iha VIII Governu Konstitusionál iha fulan hirak liubá.

Ministru Victor da Conceição Soares konsidera vizita ne’e nu’udar vizita istóriku tanba durante ne’e ko’alia de’it iha nível polítika iha Dili, maibé la haree faktu.

Objetivu hosi vizita ne’e, nia esplika, atu haree diretamente projetu boot sira ne’ebé durante ne’e estabelese iha Covalima rasik.

Projetu sira ne’ebé tama iha ajenda membru ezekutivu ne’e nian iha loron dahuluk ne’e mak  projetu auto estrada no mina-matan Suai Loro.

Notísia relevante: Governu Prevee Milliaun $1 Resin Reabilita Auto Estada Suai

Hafoin ho ekipa vizita projetu auto estrada, Governante ne’e kompromete katak sei lori dadus sira-ne’e halo diskusaun ho ministériu relevante hodi tau iha polítika ida atu solusiona problema ne’e no foti desizaun.

Membru Governu ne’e afirma, durante iha de’it Dili sempre hato’o afirmasaun polítika relasiona ho projetu auto estrada ne’ebé kondisaun balun hahú aat ona.

“Ha’u bolu afirmasaun polítika ne’ebé ha’u halo katak ita halo mega projetu ida tenke halo uluk planu, dezeñu no estudu. Ha’u hanoin hosi vizita sira ha’u nian ne’e ha’u haree rasik ho matan katak obra refere (jalan toll) ne’ebé foin atinje kilómetru 30 ne’e hamosu problema barak tebes–komesa hosi rai halai, estrada kotu, uma ne’ebé na’in abandona no problema seluk-tán. Foin kilómetru 30 de’it mak problema barak ona, kuandu projetu ne’e to’o iha Beaço (Viqueque) lahatene problema hira mak sei mosu,” Ministru haktuir ba Agência Tatoli hafoin hamutuk ho ekipa vizita Munisípiu Covalima.

Membru Ezekutivu ne’e konsidera katak problema ne’ebé akontese boot iha projetu boot sira iha Munisípiu Covalima mak projetu auto estrada.

“Ha’u haree problema pior liu maka auto estrada ne’ebé iha troxu ida-ne’e mosu rai halai, estrada kotu ho distánsia kuaze metru 300. Ne’e hatudu katak estudu sira ne’ebé halo ne’e invez halo estudu jeolójiku, jeotékniku, maibé estudu sira-ne’e laiha. Entaun, buat ne’ebé halo ne’e planu projetu ida ha’u haree parese google map,” nia subliña.

Tuir Governante ne’e, estudu ne’ebé antes ne’e halo hodi realiza projetu auto estrada ne’e la adekuadu.

“Iha inísiu toma pose, ha’u dehan invez kuda mak dada karosa más karosa mak dada fali kuda. Katak, halo de’it planu más laiha estudu no ikusmai saida mak akontese, obra sira-ne’e estraga hotu entaun tenke halo foun filafali ka tenke lakon tan osan hira,” Victor lamenta.

Tuir ajenda ne’ebé iha, loron dahuluk delegasaun ne’e vizita ba iha projetu auto estrada, ekipa sira para iha End Point Fatuk-Ahu Zumalai, no kontinua ba iha Labarai, iha área Aeroportu Internasionál Covalima, no iha Start Point Auto Estrada (Seran-Kotek).

Hafoin ida-ne’e, ekipa kontinua ba vizita Existing Temporary Jetty no mina-matan iha Suai, depois ba vizita mós konstrusaun rate komunidade afetadu hosi Aeroportu Covalima, no ikusliu ba uma ne’ebé konstrui hosi Governu ba komunidade afetadu ba konstrusaun Aeroportu Covalima.

Iha vizita loron daruak, segunda (09/11/2020), Ministru hamutuk ho ekipa iha parte dadeer sei hala’o enkontru ho Prezidente Autoridade Covalima. Iha enkontru ne’e, Ministru sei halo aprezentasaun polítika Petrolífera.

Entidade sira ne’ebé inklui iha vizita ofisiál Ministru Petróleu no Minerál nian ne’e kompostu hosi Prezidente Instituto Petróleu e Geologia (IPG), Gabriel Gaspar Aparício de Oliveira ho ekipa, Prezidente Administrasaun Autoridade Nasionál Petróleu no Minerál (ANPM), Florentino Mateus Soares Ferreira ho ekipa, no Prezidente Administrasaun Timor Gas no Petróleu, Empreza Públika (Timor GAP, E.P), António José Loiola de Sousa ho ekipa, inklui funsionáriu no tékniku MPM.

Jornalista: Antónia Gusmão

Editór: Xisto Freitas

HAKEREK NO HATÁN

Please enter your comment!
Please enter your name here