Kongresu Asosiasaun ICT-TL ba daruak iha kampus IOB, Fomentu Dili, sesta (06/11). Imajen TATOLI/António Gonçalves

DILI, 08 novembru 2020 (TATOLI)—Iha loron ikus kongresu ne’ebé realiza durante loron rua, hahú loron 05 to’o 06 novembru, kongresista kuaze 150 hili Natálio Raimundo Soares hanesan Prezidente Asosiasaun Informasaun Komunikasaun no Teknolojia Timor-Leste (ICT-TL, sigla inglés) ba mandatu tinan-haat.

Prezidente asosiasaun eleitu, hateten estrutura no membru sira hakarak promove atividade oinoin iha universide hodi konsensializa papél teknolojia no informasaun.

“Ita haree durante ne’e ema ladun tau importánsia ba ICT ne’ebé loloos iha papél importante iha dezenvolvimentu, tanba ne’e ami hakarak halo advokasia no organiza eventu iha universidade sira hodi partilla ideia ho akadémiku sira,” tenik ba Agência TATOLI, domingu ne’e.

Notísia Relevante: ICT-TL hakarak konsolida rekursu hodi kontribui ba dezenvolvimentu nasionál

Estrura foun asosiasaun ne’ebé eleitu ho votu 117 maka Prezidente ICT-TL Natálio Raimundo Soares, Vise I Elígio Monis da Rego, Vise II Armindo de Jesus, Sekretáriu Domingos Cardoso, Vise Sekretáriu I Melthy Timu no Vise Sekretáriu II Martinho Goureti.

Aleinde ne’e, asosiasaun ne’ebé harii iha tinan 2017 ne’e prepara ona planu ba kurtu prazu, atu legaliza estatutu no estabelese sekretariadu.

Enkuantu ba médiu prazu maka atu dezeña planu ba atividade anuál, estabelese sistema baze dadus ba membru no kontinua hala’o papél advokasia iha setór ICT.

“Ba longu prazu, asosiasaun atu halo programa anuál ba ICT Award, treinamentu no kapasitasaun membru inklui halo peskiza no estudu ba kestaun relasiona ho teknolojia no informasaun,” Prezidente asosiasaun esplika.  

Asosiasaun ne’e rasik iha membru kuaze 500, ne’ebé hanesan estudante no profisionál serbisu iha instituisaun públiku no privadu iha área sofware developer, database administrator, system analyst, network architect, web developer no seluk tan.

“Tanba ne’e ho rekursu ne’ebé iha, ami hakarak partilla ho halibur ideia ba ema hotu, nune’e ema bele hatene liután papél informasaun no teknolojia no adapta-an iha revolusaun dijitál 4.0, ne’ebé evolui ba bebeik entre ema ho teknolojia,” nia akresenta.

Kongresu daruak realiza iha salaun enkontru Institute of Bussiness (IOB), Fomento, ho tema ‘konsolida rekursu hodi konkretiza papél teknolojia informasaun no komunikasaun iha dezenvolvimentu nasionál’.

Atividade iha kongresu ne’e maka espozisaun dijitál, kompetisaun PUBG, Blog no Vlog inklui semináriu ho tema financial technologies revolution, E-Government Timor-Leste no ikus liu maka halo diskusaun rejimentu estatutu asosiasaun no sei hili estrutura foun.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here