Timor-Leste Debating Group (TLDG) realiza atividade debate nasionál, hahú hosi ohin to’o loron 12 novembru 2020, hodi komemora loron masakre Santa Krús, 12 novembru 1991. Imajen Tatoli/Nelia Fernandes

DILI, 07 novembru 2020 (TATOLI) –Timor-Leste Debating Group (TLDG) realiza atividade debate nasionál, hahú hosi ohin to’o loron 12 novembru 2020, hodi komemora loron masakre Santa Krús, 12  novembru 1991.

Prezidente Komisaun Organizadora, Leónia L. Freitas, hateten, atividade debate nasionál ne’e hanesan segundu debate, hodi fó oportunidade ba universitáriu sira, iha Timor laran.

“Ami organiza debate nasionál segundu nia. Iha debate ne’e, ami loke oportunidade ba estudante universidade sira, ne’ebé mai rejistu no reprezenta sira-nia universidade. Kada ekipa ida, tenke mai hosi universidade ne’ebé hanesan, sira bele fakuldade ka departamentu la hanesan, maibé sira tenke mai hosi universidade ida,” Leónia L. Freitas, informa ba Agência Tatoli, iha salaun Universidade Oriental Timor-Lorosa’e (UNITAL), Becora, Dili.

Nia hateten, atividade debate nasionál ne`e uza easing parlamentár system no debate ne’e uza ho lian Inglés.

“Oportunidade ne’ebé fó kada ekipa ema na’in-haat, ema ida juri no na’in-tolu tuir debate. No ida ne’ebé juri mai hosi universidade, sai hanesan treinu hela. Treinu para oinsá prepara sira-nia aan atu sai juri ne’ebé mak di’ak,” nia tenik.

Atividade ba debate nasionál ne’e, sei halo mós selesaun ba iha parte tolu; Primeiru ba ekipa, segundu ba indivíduu no ikus liu sei halo selesaun mós ba juri ne’ebé mai hosi universidade.

“Ami iha ne’e fó prémiu ka halo selesaun ba iha parte tolu. Primeiru ba ekipa, hanesan tim ne’ebé mak sai manan ba primeiru, segundu no terseiru. Alende ne’e ami mós haree fali ba indivíduu, se mak ko’alia di’ak no ikus liu ami mós halo selesaun ba juri sira ne`ebé hanesan treinu hela,” nia esplika.

Manan na’in ba atividade debate nasionál ne’e sei hetan prémiu hanesan piala no osan. “Ba sira ne’ebé ko’alia Inglés di’ak, ami prepara sira atu reprezenta Timor tuir debate iha rejionál no mós iha World Universities Debating Championship (WUDC). Ne`e mak ami-nia preparasaun ba futuru, atu lori manan na’in sira tuir debate reprezenta Timor,” nia hatutan.

Iha fatin hanesan, Magnífiku Reitór UNITAL, Florindo Pereira, hateten, sira-nia parte kontente, tanba ho atividade debate nasionál ne’e bele koko juventude sira, oinsá atu ko`alia lian Inglés ho di’ak no debate ne’e ho buat ne`ebé pozitivu ba sira.

Atividade debate nasionál ne’e, partisipante mai hosi universidade sira iha Timor laran, hanesan Instituto  Filozofia no  Teolojia (ISFIT), João Saldanha University (JSU), Institute OF Business (IOB), Universidade Orientál Timor Lorosa`e (UNITAL) no Universidade Nasionál Timor Lorosa’e (UNTL).

Atividade debate nasionál ne’e mós hetan apoiu hosi Embaixada Australia iha Timor-Leste, Sekretária Estadu Juventude no Desportu (SEJD), kompañia M`Giel, Universidade Orientál Timor Lorosa`e (UNITAL), Bee Lafaek no Telkomcel.

Jornalista     : Nelia Fernandes

Editór            : Francisco Simões

HAKEREK NO HATÁN

Please enter your comment!
Please enter your name here