AINARO, 07 novembru 2020 (TATOLI)–Kompañia Maddog Adventures husu ba Ministériu Turizmu Komérsiu no Indústria (MTKI) atu halo mapamentu no kalendáriu turizmu, nune’e bele hafásil turista doméstika no estranjeiru halo vizita ba fatin turíztiku iha Timor-Leste.
Mata dalan Maddog Adventures ba promosaun turizmu no kampaña ‘Ha’u-nia Timor-Leste’, Romano Martins, konsidera mapamentu no kalendáriu turíztiku ne’e importante no nesesáriu ba ema lokál no internasionál atu fasilita hatene fatin potensiál iha rai-laran.
“Ami iha mehi boot atu la’o tuir istória sira iha Timór, ne’ebé sei serbisu hamutuk ho munisípiu sira hodi halo uluk kelendáriu turizmu no husu MTKI mak toma konta ba kestaun ne’e,” Romano Martins hateten ba Agência TATOLI, sábadu ne’e, hafoin vizita fatin turíztiku Bee Tudak Dokomali iha suku Nunumoge, postu administrativu Hatobuiliku, munisípiu Ainaro.
Nia fó ezemplu katak, bainhira turizta hakarak vizita Bee Tudak Dokomali, maibé lahatene dalan bele konsulta iha mapamentu turizmu ne’ebé Governu dezeña ona.
Kompañia ne’e iha rekursu sufisiente atu ajuda MTKI hodi bele haree hamutuk dezenvolve área turizmu.
“Ami iha rekursu umanu sufisiente. Ami mós iha dokumentu fatin turíztiku kompletu tanba ami moos estuda kona-ba turizmu,” nia deklara.
Enkuantu kona-ba kalendáriu turíztiku, Romano Martins esplika, bele identifika uluk hosi munisípiu idaidak nian hodi hatene katak kada fulan iha munisípiu ida iha atividade saida de’it.
“Munisípiu ne’ebé sempre iha atividade kulturál boot hanesan iha Ainaro, baibain halo iha fulan saida, ita bele tau ona iha kalendáriu, nune’e turizta sira mós bele hatene,” nia fó hanoin.
Aleinde ne’e, iha Timor-Leste baibain ema halo peregrinasaun ba sítiu relijiozu Na’in-Feto Ramelau iha 07 outubru, ne’ebé bele tama hotu iha kalendáriu.
Jornalista: Natalino Costa
Editora: Júlia Chatarina
