AINARO, 07 novembru 2020 (TATOLI)–Maddog Adventures nu’udar kompañia ne’ebé tau-matan ba área promosaun turiztika Timor-Leste, hahú halo promosaun iha área turizmu liuhosi kampaña ‘Ha’u-nia Timor-Leste’ no hetan apoiu hosi Ajénsia Nasaun Unida ba Dezenvolvimentu Internasionál (USAID, sigla inglés).
Mata dalan Maddog Adventures ba promosaun turizmu kampaña Ha’u-nia Timor-Leste, Romano Martins, hateten daudaun nasaun tomak inklui Timor-Leste infrenta problema no dezafíu boot pandemia COVID-19, tanba ne’e presiza realiza atividade hodi kontinua halo promosaun ba fatin turizmu sira.
“Krize pandemia fó impaktu ba Timor-Leste ekonómikamente no iha setór turizmu no kuaze turista barak maka fila ba sira-nia rai, entaun programa ne’e fó oportunidade ba ami atu tulun joven sira hamutuk promove no esplora fatin turizmu ne’ebé maka eziste iha Timor-Leste,” Romano Martins dehan ba Agência TATOLI, sábadu ne’e, hafoin vizita tiha fatin turíztiku, Bee Tudak Dokomali iha suku Nunumoge, postu administrativu Hatobuiliku, munisípiu Ainaro.
Tuir Mata dalan ne’e, tempu ona populasaun Timor-Leste sai na’in ba fatin turiztiku iha rai rasik.
“Ita labele hein de’it turista estrajeiru, tanba ita nu’udar timor-oan mós sai hanesan turista doméstiku, ne’e duni husu ita hotu hakarak ka lakohi tenke hamutuk promove no diversifika fatin turizmu iha Timor-Leste,” nia akresenta.
Sorin seluk nia nota katak, Timor-Leste iha sítiu turizmu furak ho ninia paizajen sira ne’ebé bele dada ema hotu nia atensaun, maibé durante ne’e ladún iha atensaun másimu hosi autoridade munísipiu no postu administrativu inklui Governu.
“Tanba ne’e ami-nia presenza liuhosi kompaña iha munisípiu Ainaro, hakarak esplora oituan fatin potensiál turíztiku iha munisípiu ne’e inklui produtu ne’ebé bele atrai ema atu mai halo vizita,” nia akresenta.
Maddog Adventures lori manan-na’in 12 hamutuk halo kampaña
Antes ne’e, ajénsia turizmu ne’e realiza kompetisaun no hetan manan na’in, ne’ebé hamutuk hodi halo kampaña.
Romano Martins konsidera fatin turiztiku presiza promove no proteje, nune’e bele prezerva nafatin atu Governu bele dezenvolve no tau fasilidade adekuandu inklui hasa’e asesibilidade ba ema halo vizita hodi bele lori reseita ba Estadu iha futuru.
“Ami kontente bele hola parte iha kampaña no lori ekipa hamutuk 12 ne’ebé maioria joven, tanba sira maka jerasaun kontinuadór nasaun. Tanba ne’e, ami envolve iha eventu ida-ne’e atu iha espíritu promosaun, protesaun no prezervasaun ba ita-nia fatin turizmu sira,” nia esplika.
Nia hatutan, programa ne’e sei iha ninia kontinuasaun hanesan identifika potensiál turizmu iha Timor-Leste.
Entertantu atividade Maddog adventures hahú hosi Dili no haree uma lisan iha Maubisse, Bee Tudak Ersa-Libuti, produsaun morangu iha postu administrativu Maubisse no ikus liu vizita ba sítiu Na’in Feto Ramelau.
Atividade ne’e rasik hala’o durante loron-rua, hahú hosi sábadu (07/11) no ramata iha domingu (08/11).
Jornalista: Natalino Costa
Editora: Julia Chatarina