Prezidente CCFP, Juvinal Dias. Imajen/Espesiál

DILI, 07 novembru 2020 (TATOLI)—Prezidente Konsellu Konsultivu Fundu Petrolíferu (CCFP-sigla portugés), Juvinal Dias, preokupa ho Governu nia sustentabilidade fiskál ne’ebe kontinua defende ba fundu minarai iha Orsamentu Jerál Estadu (OJE) kada tinan.

Buat ne’ebé CCFP preokupa mak sustentabilidade fiskál. Klaru katak despeza orsamentu kada tinan sa’e, ne’e tanba nesesidade Governu. Kresimentu populasaun no inflasaun ho valór moeda rasik, dalabarak halo orsamentu ne’e sa’e. Maibé situasaun ida-ne’ebé ami preokupa mak ita-nia kapasidade atu hetan fali osan mak limitadu. Entaun, CCFP hanoin katak Governu presiza mai ho modelu ekonómiku foun ida,” Prezidente Konsellu Konsultivu Fundu Petrolíferu (CCFP-sigla portugés), Juvinal Dias, informa ba Agência TATOLI iha resintu Parlamentu Nasionál, sesta ne’e.

Nia afirma, Governu labele hanoin mak gasta osan de’it maibé tenke hanoin rendimentu ba Estadu atu nune’e bele substitui rendimentu minarai tanba fundu petrolíferu de’it mak finánsia OJE kada tinan fiskál.

“Ita hotu hatene katak Bayu Undan besik atu maran ona. Situasaun ekonómiku mundiál sedauk la’o di’ak entaun ita presiza modelu foun. Dalan ida-ne’ebé dala barak ami sujere ba parlamentu maka oinsá haree despeza rekorente hanesan opurtunidade ba Estadu atu-bele hetan rendimentu doméstika,” Prezidente CCFP ne’e fó hanoin.

Nia fó ezemplu, Governu tenke introdús uma ba povu, ne’ebé povu bele selu hosi osan ne’ebé nia hetan tanba despeza rekorrente ne’e maiór parte ba benefísiu ema-nian, entaun Governu tenke buka dalan ida atu-bele hetan rendimentu hosi despeza rekorente.

Nune’e mós, nia hatutan, fó subsídiu ba agrikultór sira hodi hasa’e produsaun, hapara importasaun no Sentru Lojístika Nasionál (CLN-sigla portugés) bele sosa fila-fali produtu hosi grupu agrikultór hafoin fa’an fila-fali ba sidadaun sira.

“Ne’e dalan ida-ne’ebé ita bele hetan osan hosi despeza rekorente,” nia dehan. 

Prezidente CCFP ne’e esplika, polítika Governu nian atu halo reforma finansa públika tenke ho baze asegura despeza no tenke la’o tuir ho forsa rendimentu nian.

“Se ita-nia rendimentu ne’e menus liu, despeza ne’e tenke ajuda atu aumenta rendimentu iha futuru no OJE ne’e tenke mai ho polítika ida bele mós foti osan hosi rendimentu doméstika,” nia hateten.

Nia fundamenta, fatór ne’ebé fó influénsia boot problema finanseira ohin loron tanba Timor-Leste nia planu ba modelu dezenvolvimentu ekonómiku la sustentável.

Nune’e mós, nia dehan, nasaun RDTL depende makaas ba sasán importasaun, ekonomia Timor-Leste nian dalabarak depende ba Orsamentu Jerál Estadu (OJE).

Nia argumenta, bainhira Timor-Leste nia modelu dezenvolvimentu la sustentável labele garante valór ekonómiku ba tempu naruk.

“Kuandu ita hanoin OJE mak bele dezenvolve ekonomia, ekonomia mós mate iha fatin. Ne’e fatór ida-ne’ebé mak bele determina. Ita hanoin atu muda fatór hirak ne’e dalan mak reformula ita-nia polítika ekonomia,” Prezidente CCFP ne’e hateten.

Iha loron 16 novembru 2020, CCFP sei fó pareser ba Parlamentu Nasionál liuhosi audiénsia públika OJE 2021 nian.

“Ami sei fó ami-nia opiniaun kona-ba oinsá bele salva fundu petrolíferu, labele hotu iha tinan 10 oin mai. Ami sei sujere ba parlamentu atu uza fundu hanesan motor arranka ba dezenvolvimentu ekonómiku. Labele uza fundu hanesan fonte de’it depois ikus mai labele fó retornu. Kuandu fundu hotu ona, ita laiha kapasidade atu-bele hetan tán rendimentu,” nia dehan ida-ne’e mak pareser ne’ebé CCFP sei hato’o ba Parlamentu Nasionál.

Sustentabilidade Fiskál 

Bazea ba Livru (Panorama Orsamentál) previstu despeza Governu sei depende makaas ba fundu minarai. Governu nia politíka fiskál mak Politíka Fiskál Antesipada (frontloading fiscal policy). Katak, halo orsamentu Estadu boot iha períodu tempu badak liuhosi finansiamentu esesu levantamentu hodi finánsia dezenvolvimentu kapitál umanu no infrastrutura bazíka atu fasilita no enkoraja investimentu setór privadu no diversifika ekonomia.

Iha livru panorama orsamentál ne’e hateten, kresimentu ekonómiku ne’ebé forte no sustentável ho investimentu setór privadu sei hamosu reseita doméstika barak no hamenus levantamentu hosi fundu minarai iha futuru.

Governu liuhosi Ministériu Finansa halo análize sustentabilidade fiskál ba tetu orsamentu kada tinan. Liuhosi análize ida-ne’e bele hatene sustentabilidade fiskál ba tempu naruk, partikularmente sustentabilidade fundu minarai.

“Análize sustentabilidade fiskál foku ba impaktu despeza kapitál ba PIB no koleksaun reseita doméstika iha tempu naruk no nia implikasaun ba balansu fundu minarai. Bazea ba senáriu despeza ne’ebé aprezenta iha tabela 1 ho kategoria orsamentu hotu‐hotu sei sa’e 4% kada tinan, esepsaun ba kapitál dezenvolvimentu ne’ebé nia kresimentu bazea ba estimasaun hosi fundu  infraestrutura  ba  períodu  2021‐2025,  kresimentu  ekonómiku no inflasaun. Ho senáriu ida-ne’e, prevee  katak fundu minarai sei hotu iha 2033 ka hotu  iha  tinan  13 nia laran,” refere livru panorama orsamentál.

Reseita Fundu Minarai

Iha livru panorama orsamentál ne’e esplika, fundu minarai kontinua nu’udar fonte finansiamentu prinsipál ba OJE. Levantamentu  fundu  minarai  halo  liuhosi  mekanizmu (Rendimentu Sustentável Estimadu (RSE) no  esesu levantamentu ne’ebé tenke utiliza ba interese Timor-Leste nian iha tempu naruk.

Kalkulasaun RSE halo bazea ba projesaun valór fundu minarai iha inisiu tinan finanseira no valór prezente hosi reseita minarai ne’ebé atu hetan iha futuru. Presupostu sira-ne’ebé uza ba kalkulasaun RSE ba OJE 2021 kuaze hanesan ho OJE 2020 nian, maske retornu investimentu no reseita petrelífera iha 2020 iha mudansa tanba hetan aumentu.

Nunee, prevee katak sei iha aumentu ba balansu fundu minarai no RSE ba 2021 sei sa’e ba millaun $547.9 ka iha aumentu millaun $12.3. Levantamentu fundu minarai ba OJE 2021 hamutuk biliaun $1,377, reprezenta 7.6% rikusoin petrolíferu no esesu levantamentu hamutuk millaun $829.7.

Purtantu to’o iha fulan-setembru, balansu fundu minarai hamutuk biliaun $18,469, retornu investimentu hamutuk millaun $906.5 (5.2%) no reseita petrolíferu hamutuk millaun $290.4 . Prevee katak balansu fundu minarai to’o tinan 2020 nia rohan hamutuk  biliaun $18,065.7.

Maibé balansu ida-ne’e bele muda depende ba dezempeñu investimentu iha merkadu finanseiru no levantamentu hodi finánsia orsamentu Estadu iha kuarter ikus tinan 2020 nian.

“Valór fundu minarai prevee sei kontinua tún iha futuru tanba reseita minarai sei kiik kompara ho tinan anteriór nu’udar konsekuénsia hosi produsaun iha kampu Bayu‐Undan ne’ebé tún no retornu investimentu dala ruma la sufisiente ka kiik kompara ho nível levantamentu,” refere livru panorama orsamentál, ne’ebé asina hosi Ministra Finansa Ein-Ezersísiu, Sara Lobo Brites.

Jornalista: Evaristo Soares Martins

Editór: Cancio Ximenes      

HAKEREK NO HATÁN

Please enter your comment!
Please enter your name here