iklan

NASIONÁL, HEADLINE, KAPITÁL

Rede Feto ezije justisa adekuadu ba kazu Raikotu

Rede Feto ezije justisa adekuadu ba kazu Raikotu

Prezidente Konsellu Rede Feto Timor-Leste, Yasinta Luzinha. Imajen TATOLI/Evaristo Soares Martins.

DILI, 06 novembru 2020 (TATOLI)—Prezidente Rede Feto Timor-Leste, Yasinta Luzinha, ezije ba parte justisa atu fó pena ne’ebé merese duni ba ema ne’ebé mak komete krime violénsia hasoru feto no labarik feto iha Aldeia Terra-Santa, Raikotu, Suku Madohi, Postu Administrativu Don Aleixo, Munisípiu Dili foin lalais ne’e.

“Ami Rede Feto no parseiru sira ezije ba parte justisa atu fó pena ne’ebé merese duni ba kriminozu ne’ebé oho matebian Domingas Soares no vítima LD,” Prezidente Rede Feto Timor-Leste, Yasinta Luzinha, hateten ba Agência TATOLI iha nia knaar fatin, Obrigado Barak, Dili, sesta ne’e.

Nia hatutan, durante ne’e Rede Feto ho nia membru sira ne’ebé serbisu liga ho asisténsia ba vítima hanesan FOKUPERS, PRADET, Fundasaun ALOLA, MOFFE, kontinua hala’o   papél hodi akompaña kazu ida-ne’e hodi garante katak kazu ne’e la’o  tuir justisa ne’ebé loloos, la hamosu informasaun falsa nune’e labele hamenus pena ba suspeitu.

Eis diretora MOFFE ne’e, kontinua fó apoiu no enkoraza sasin no mós lezada atu iha nafatin saúde ne’ebé di’ak hodi prepara aan hasoru prosesu justisa.

Rede Feto agradese ba organizasaun membru sira no mós parseiru sira hanesan Arquires, ALFela no CNITL ne’ebé fó apoiu no asisténsia direta ba vítima depois de akontesimentu iha Raikotu.

“Ita apresía ho hanoin balun hosi maluk sira relasiona ho justisa ba matebian Domingas Soares, nakloke simu krítika konstrutivu no prontu kolabora hodi apoiu asisténsia ba vítima no luta ba justisa violénsia bazea ba jéneru,” nia hateten.

Rede Feto konsidera estadu mak autór prinsipál ho nia obrigasaun mak promove, proteje no hakonu direitu sidadaun nian liga ba Konstituisaun RDTL, artigu 105 kona-ba kompeténsia no knaar Governu nian no mós  hanesan sidadaun ema hotu iha dever hodi hamriik no kontra forma violénsia saida de’it hasoru feto no labarik feto.

Tanba ne’e, Rede Feto ejize ba Governu Timor-Leste liuliu parte kompetente hanesan Polísia Nasionál Timor Lorosa’e (PNTL), tenke fó seguransa másimu ba iha fatin akontesimentu hodi proteje no salva guarda ba evidénsia iha terrenu.

Rede Feto mós husu ba Minsitériu Públiku (MP) tenke halo análiza kle’an ba kazu ne’e hodi akuza tuir gravidade hosi kazu ne’e inklui husu indeminizasaun sivíl no garante vítima hetan nia direitu iha prosesu tomak.

Diretora ne’e mós husu ba Tribunál tenki garante julgamentu ne’ebé justu tuir lei no hatúr justisa ba vítima, Ministériu Justisa (MJ), tenke hare implementasaun lei nú.2/2009 kona-ba protesaun ba testemuña hodi fó protesaun másimu ba vítima LD hanesan sasin importante ba iha kazu omisídiu Raikotu no mós ba kazu sira seluk.

ALende ne’e, Rede Feto husu Sekretáriu Estadu Igualdade no Inkluzaun (SEII) tenke asegura hodi fó  suporta ba vítima tuir padraun, nune’e mós Ministériu Solidariedade Sosiál no Inkluzaun (MSSI) tenke apoiu vítima violénsia hasoru feto no labarik, hodi koordena no apoiu asisténsia sosiál ba vítima.

Liga ho akkontesimentu Raikotu, Prezidente Rede Feto hamutuk ho nia membru no parseiru sira hakarak bolu atensaun no husu ba públiku hodi labele julga organizasaun sosiedade sivíl, maibé husu ba  parte hotu  hamutuk hodi hapara formá violénsia oioin hasoru feto, labarik feto no grupu vurnerável iha Timor-Leste.

“Ita sei hapara liuhosi kampañia loron 16 nian ita territóriu Timor-Leste hodi oinsá ema kriminozu labele hanoin tan krime ba feto no labarik feto sira iha nia uma no iha sosiedade nia-leet. Atu hapara violénsia hasoru feto no labarik feto tenke serbisu hamutuk ho entidade hotu-hotu hodi nune’e bele hakotu,” Yasinta dehan.

Tuir nia, bainhira Rede Feto mesak mak hapara, ne’e labele maibé konsiénsia ema hotu nian tantu nia feto ka mane tenke kontribui ba pás no estabilidade ba rai ida ne’e. Oras ne’e daudaun, vítima asegura hela iha uma mahon ida iha Timor-Leste hodi kontinua hein prosesu tuir mai.

Notísia Relevante: Kazu Raikotu, PN-Rede Feto sujere tribunál aplika pena todan

Jornalista: Osória Marques

Editór: Cancio Ximenes

iklan
iklan

Leave a Reply

iklan
error: Content is protected !!