Prezidente AACTL, Eusébio Freitas simu pose, iha sesta (06/11), iha salaun MTK. Imajen TATOLI/Natalino Costa

DILI, 06 novembru 2020 (TATOLI)--Prezidente Autoridade Aviasaun Sivíl Timor-Leste (AACTL, sigla portugés) foun, Eusébio Freitas sei tau prioridade ba área haat ne’ebé konsidera importante liu durante mandatu. 

Eusébio Freitas hato’o asuntu ne’e, liuhosi diskursu iha serimónia simu pose hodi troka prezidente AACTL sesante, Ana Rosalia Varela Ximenes, sesta ne’e, iha  salaun Ministériu Transporte no Komunikasaun Caikoli.

“Área haat ne’e maka autoridade aviasaun sei kontinua halo fiskalizasaun ba projetu konstrusaun aeroportu internasionál Prezidente Nicolau Lobato, halo sertifikasaun ba aeroportu sira, harii  nation aviation civil equality, inklui promove no implemeta akordu serbisu aeru,” Eusébio Freitas esplika.

Aleinde ne’e, hanesan prezidente foun, nia sei esfosu atu asegura formasaun kona-ba kooperasaun atu luta kontra krize COVID-19, liuliu prioridade tinan oin sei halo implementasaun ba padraun aviasaun sivíl tuir autoridade nian. 

Nia nota katak durante ne’e setór aviasaun sivíl nunka iha esperiénsia ho krize surtu COVID-19 hanesan daudaun hodi invade mundu, tanba ne’e autoridade aviasaun sivíl sei dezempeña papél hodi superviziona seguransa bazeia ba kritériu organizasaun mudiál aviasaun sivil nian (ICAO, sigla inglés) atu asegura implementasaun vida emerjénsia tuir rekomendasaun.

Notísia Relevante: Eusébio Freitas nomeadu sai Prezidente AACTL foun

“Konsellu administrasaun foun hamutuk ho ami-nia diresaun no funsionáriu tomak, mai ita hamutuk atu serbí.  Fiar katak, ita sei ultrapasa dezafíu, kria ambiente di’ak iha setór aviasaun Timor-Leste, nune’e bele kontribui ba sósiu ekonómiku nasaun atubele lori Timor-Leste ba oin no labele husik iha kotuk,” Jerente foun ne’e konvida.

Biban ne’e nia sei kontinua asegura koordenasaun ho liña ministériu sira  hodi asegura voo umanitária, dezlokasaun emerjénsia no repatriasaun liuhosi komunikasaun ho Ministériu Negósiu Estranjeiru no Kooperasaun (MNEK), Ministériu Saúde (MS) Ministériu Transporte Komunikasaun (MTK) no mós Ministériu Interiór (MI).

“Membru konsellu admimistrasaun foun sei kontinua asegura kompromisu no kontinua serbisu bazeia ba dekretu lei númeru 8/2005, apoiu politika nasionál aviasaun sivíl ne’ebé aprova ona iha 2017,” nia subliña.

Iha fatin hanesan, Ministru Transporte no Komunikasaun, José Agostinho da Silva husu ba estrutura foun AACTL ne’ebé lidera hosi Prezidente Eusébio Freitas ho vogál rua atu halo serbisu  ho responsabilidade no kualidade.

Governante ne’e mós husu ba estrutura foun AACTL atu hadok-an hosi tentativa oin-oin, ne’ebé la lori benefísiu ba Estadu.

Nune’e mós , Prezidente Komisaun Funsaun Públiku (KFP), Faustino Cardoso ne’ebé partisiapa iha serimónia pose ne’e rekoñese katak ezonerasaun no nomeasaun iha kualkér instituisaun hanesan buat todan ida.

Maske nune’e, Faustino konsidera ida-ne’e hanesan kestaun normál ne’ebé mosu iha kultura instituisaun Governu nian, maibé importante liu maka hetan fiar hodi asume kargu ruma tenke kolabora ho parte hotu atu  dezempeña funsaun ne’e ho di’ak no ho responsabilidade.

“Buat ida ezonerasaun no nomeasaun ne’e liafuan rua ne’ebé diferente iha ninia signifikasaun, maski liafuan rua ne’e mosu, ida halo kontente ema no ida seluk halo ema triste. Maibé, ha’u louva Prezidente AACTL foun ne’ebé iha nia diskursu hateten katak, ho kargu ne’ebé nia simu sei serbisu no koordena hodi hadi’a di’ak liután iha futuru,” nia louva.

Faustino mós konsidera serimónia pose ne’e hanesan buat baibain ida, maibé, importante maka atu hadi’a serbisu iha ekipa nune’e bele alkansa no konkista meta instuisaun no estadu nian.

Entertantu, Prezidente AACT foun Eusébio Freitas ne’ebé simu pose akompaña husi vogál na’in-rua no asina kedan termu pose nian, asiste direta husi Prezidente KFP Faustino Cardoso no Ministru Transporte Komunikasaun José Agostinho.

Partisipa iha serimonia ne’e, Prezidente Komisaun E Parlamentu Nasionál Abel Pires, Prezidente AACTL sesante Ana Rosalia ho ninia estrutura, jestór ba ajénsia autónomu ne’ebé tutela iha MTK, funsionáriu AACTL no entidade sira seluk.

Jornalista: Natalino Costa

Editora: Júlia Chatarina

HAKEREK NO HATÁN

Please enter your comment!
Please enter your name here