Vise-Ministra Finansa, Sara Lobo Brites. Imajen TATOLI/Egas Cristovão

DILI, 06 novembru 2020 (TATOLI)—Ministériu Finansa (MF) prevee orsamentu $34.133.354 iha proposta Orsamentu Jerál Estadu (OJE) tinan fiskál 2021.

Totál ne’e fahe ba kategoria saláriu no vensimentu $3.372.689, bens no servisu $21.056.654, kapitál menór $9.054.115, kapitál dezenvolvimentu $649.896, no transferénsia públiku laiha.

Ministra Finansa ein ezersísiu, Sara Lobo Brites, konsidera orsamentu ne’ebé prevee ba ministériu razoável hodi hatan ba programa reforma ne’ebé mak iha.

“Reforma la’ós ba lei de’it maibé rekruta ema, sosa ekipamentu, koordena ema, prepara fasilidade no eskritóriu atubele hetan reseita orsamentu hosi Ministériu Finansa,” governante ne’e relata hafoin audiénsia públiku ho Komisaun C (finansa públika no komisaun E (infraestrutura) ba proposta OJE 2021 iha sala plenária, sesta ne’e.

Atuál Vise-Ministra Finansa ne’e dehan, tinan ne’e orsamentu ba ministériu ne’e boot tanba iha mudansa estrutura orsamentu.

“Mudansa sira ita hakarak halo orsamentu pur programa orsamentu ne’ebé atribui ba ministériu responsável atu implementa, tanba ne’e mak muda tiha montante sira ne’ebé mak tau iha Orçamento Tudo Governo ne’e mai hotu Ministériu Finansa ninia osan rasik. Uluk tau maibé tau separadu, ba Ministériu Finansa ketak  Orçamento Tudo Governo ketak,” nia esplika.

Orsamentu ne’ebé prevee sei kooresponde ba medida prinsipál setór 10 iha tinan 2021.

Medida prinsipál maka hanesan reforma jestaun finansa públika, rekolla dadus no prodúz estatístika viável ho kualidade, jere OJE no asegura jestaun despeza públika ho transparánsia no rigór.

Nune’e mós, implementa programa setór finansa, apoiu orsamentál, mobiliza rekursu finanseiru no dívida públika.

Aleinde ne’e, mobiliza no jere rekursu esternu, promove efisiénsia no efikásia iha arrekadasaun reseita públika, jere ativu patrimóniu Estadu movél no imóvel, kondúz tramitasaun ein média projetu 5 to’o 6 komplesu liuhosi Komisaun Nasionál Aprovizionamentu (CNA, sigla portugés), no ikus promove boa governasaun no jestaun institusionál.

Entretantu tetu agregadu no dezagregadu proposta OJE 2021 ho montante biliaun $1,895, fahe ba ketegoria saláriu no vensimentu millaun $239,26, bens no servisu millaun $421,49, transferénsia públika millaun $669,91, kapitál menór millaun $61,14, no kapitál dezenvolvimentu millaun $503,20.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here