Ministru Agrikultura no Peska, Pedro dos Reis. Imajen TATOLI/Evaristo Soares Martins.

DILI, 06 novembru 2020 (TATOLI)—Ministériu Agrikultura no Peska (MAP) propoin $31,964,258 iha proposta-lei Orsamentu Jerál Estadu (OJE) 2021.

Orsamentu $31,964,258 ne’e inklui $5,177,675 ba implementasaun planu rekuperasaun ekonómika.

Hosi montante orsamentu $31,964,258 ne’e koloka ba saláriu no vensimentu $4,134,585, bens (sasán) no servisu $14,543,381, kapitál minór $9,763,292, kapitál dezenvolvimentu $2,373,000 no kapitál dezenvolvimentu $1,150,000

“Sei iha orsamentu adisionál balun ne’ebé ke rekomenda hosi Komisaun D (Ekonomia no Dezenvolvimentu) hodi haree ba povu nia moris no dezenvolvimentu maibé ami prioridade ba tinan 2021 mak produsaun no produttividade hodi diversifika ekonomia,” Ministru Agrikultura no Peska, Pedro dos Reis, informa ba jornalista sira, hafoin halo audiénsia públika ho Komisaun D iha Parlamentu Nasionál, sesta ne’e.

Bazeia livru 2 (Planu Asaun Anuál) previstu medida prinsipál setoriál ba tinan fiskál 2021 mak promove aumentu sustentável iha produsaun no produtividade ho diversifikasaun produsaun agríkola.

Nune’e mós kontribui hodi melloria aseseu ba merkadu no valór akresentadu sira, asegura jestaun no prezervasaun rekursu naturál no implementa polítika jéneru.

Medida prinsipál ikus liu mak promove boa governasaun no jestaun institusionál iha ministériu nian, fortalese instituisaun no eleva kapasidade rekursu umanu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here