Atividade rejistu labarik iha Postu Administrativu Baucau Vila, Munisípiu Baucau. Imajen/DNRN

DILI, 05 outubru 2020 (TATOLI)—Estudante estajiáriu na’in neen husi Departamentu Komunikasaun Sosiál, Universidade Nasionál Timor Lorosa’e (UNTL) durante sira-nia estájiu fulan-rua sei rekolla dadus kona-ba labarik husi tinan 0 to’o tinan 5.

Programa ne’e sei hala’o iha Munisípiu Ermera, Aileu, Manufahi, Covalima no Liquiça.

Notísia Relevante :CRC Hetan Ajuda Husi UNICEF Apoiu Programa Rejistu Moris

Vise Dekanu Asuntu Finansa UNTL, Julio Aparício, informa estudante estajiáriu na’in neen ne’e sei destaka bá iha radiu komunidade sira maibé foku liu ba programa promove rejistu moris ba labarik sira.

“Dadus moris ne’ebé ita-nia estajiáriu sira sei rekolla mak sei rejistu bebé sira ne’ebé mak foin moris husi tinan 0-5. tanba dala barak ita-nia inan aman sira iha ne’ebá ladun tau importante ba labarik sira ninia dadus moris tan ne’e difikulta labarik sira bainhira kontinua ba eskola la hatene sira ninia data moris,” nia hateten ba jornalista sira iha Kampus Faspol UNTL, Caicoli, kinta ne’e.

Programa promove rejistu moris ba labarik sira iha Munisípiu neen ne’e, UNTL servisu hamutuk ho Sekretáriu Estadu Komunikasaun Sosiál (SEKOMS), Ministériu Justisa, Ajénsia Internasionál UNICEF no Embaixada Japaun iha Timor-Leste.

Nia dehan Governu ho parseiru sira fó konfiansa tomak ba estudante estajiáriu sira atu uza oportunidade ne’e hodi promove rejistu moris ba labarik liuhosi programa radiu komunidade.

Iha fatin hanesan estudante estajiáriu, Francisco Colo, promete sei implementa programa ne’e ho susesu durante sira-nia estájiu iha baze.

“Ami prontu tanba hetan ona formasaun husi UNICEF kona-ba matadalan oinsá atu halo monitorizasaun ba radiu komunidade sira no maneira atu rekolla dadus liuhusi metódu online, dadus sira ne’e sira sei relata mai fali UNICEF inklui UNTL liuhusi Departamentu no Fakuldade Siénsia Sosiál,” nia informa.

Notísia Relevante :DNRN rejista ona labarik 35,156 iha territóriu nasionál

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here