Komandu F-FDTL liuhosi Autoridade Marítima Nasionál Timor-Leste (AMN) hala’o reuniaun ba dala-rua ho reprezentante interministeriál hodi diskute prosesu fahe kompeténsia servisu iha Komandu Jenerál F-FDTL, Dili, 06 novembru 2020 Imajen/F-FDTL

DILI, 06 novembru 2020 (TATOLI)- Komandu FALINTIL-Forsa Defeza Timor-Leste (F-FDTL) liuhosi Autoridade Marítima Nasionál Timor-Leste (AMN), ohin, kontinua hala’o reuniaun ba dala-rua ho reprezentante interministeriál hodi diskute prosesu fahe kompeténsia servisu.

Notísia Relevante : Governu Sei Aprova Kriasaun Autoridade Marítima Nasionál

Timor-Leste

Reuniaun ne’e sosializa mós formatu servisu no estrutura orgánika ba kriasaun AMN tuir dekretu lei númeru 39/2020, de 23 de Setembru, ba liña ministerial hodi fó mós sira-nia hanoin, molok AMN hala’o knaar iha tinan foun 2021.

Iha enkontru ne’e diskute mós kada liña ministériu sei hili sira-nia reprezentante funsionáriu tékniku profisionál na’in-rua hodi aprezenta ba AMN hodi halo preparasaun tékniku ba ekipa ne’ebé sei hala’o servisu no simu pose iha tempu besik.

Xefe Estadu Maiór Jenerál F-FDTL, Majór Jenerál Lere Anan Timur  konsidera enkontru ne’e importante para reprezentante sira ne’ebé sei hala’o servisu fó suporta ba AMN tenke hatene objetivu harii AMN ho ninia lei organiza estrutura servisu

Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

“Liña ministériu sira ne’ebé envolve iha AMN, ohin, ita mai para fahe servisu ba malu, hodi diskute idak-idak ninia kompeténsia, tanba ema barak kuandu servisu problema barak sei mosu iha kompetisaun servisu iha uma laran. Entaun ita diskute no  ita koopera hamutuk hodi apoiu servisu ne’e,”  Lere hateten liuhosi  nia diskursu abertura reuniaun ne’e iha Komandu Jenerál F-FDTL, Fatuhada, Dili.

Nia dehan, ohin loron Timor-Leste nia rikusoin barak iha tasi-laran labele kontrola, tanba Timor-Leste seidauk iha meius atu kontrola krime organizadu bainhira ema na’ok ikan no rikusoin sira seluk tan.

“Ita nia riku barak iha tasi-laran, krime organizadu kuaze akontese iha tasi-laran ne’ebá, mezmu ita halo fronteira ho Indonézia no Australia, maibé iha tasi buat aat no di’ak lao iha ne’ebá. Tanba ne’e AMN harii, ita maka sei kaer no harii AMN ba Timor-Leste,”  nia tenik.

Ba futuru, Timor-Leste sei kontinua koopera ho Austrália, Portugál, Nova Zelándia  no Indonézia atu halo seguransa hamutuk iha tasi.

Tuir Lere, AMN hanesan uma foun ida foin maka harii, presiza ema hotu nia apoiu hodi harii AMN.

Nia subliña tan, servisu iha AMN la’ós atu kompete, maibé ajuda malu hodi hetan servisu ida ba vitória.

“Ita nia servisu mak ne’e, bainhira ema ida hetan derrota, ne’e ita hotu derrota, maibé ita seluk hetan vitória, ne’e ita hotu nia vitória, ne’e maka importante liu,” Lere hateten.

Lere hatutan, Ministériu Defeza no Ministériu Interiór sei kontinua kapasita ninia membru sira iha área seguransa hodi apoiu servisu ho liña ministeriál sira atu fó susesu ba servisu.

Komandante jerál F-FDTL ne’e hatutan, atu defende soberania tasi no rai-maran, sai nu’udar pilár importante tebes ba Timor-Leste.

Rekoñese kapasidade Xanana

Iha parte seluk, Lere husu atu Timoroan sira tenke rekoñese kapasidade lider Karizmátiku, Kay Rala Xanana Gusmão ne’ebé luta lori Timor-Leste manan hikas soberania tasi Timor-Leste no rai-maran.

“Maun Xanana nia iha karizma  lori funu to’o ita manan, Xanana ba diskute kona-ba ita nia tasi mós ema fó de’it, tanba ne’e ita harii AMN ne’e atu defende no próteze duni ita-nia rikusoin ida ne’e,” Lere hateten.

Kapitaun-de-Mar-e-Guerra, Higino da Neves. Imajen/F-FDTL

Iha fatin hanesan, Kapitaun-de-Mar-e-Guerra, Higino da Neves dehan, enkontru  ne’e halo de’it introdusaun ba servisu estrutura no diresaun sira nian ne’ebé ninia prosesu hotu- hotu prepara ona no hein de’it implementasaun.

Higino das Neves  hatutan, sira introdús mós regulamentu tolu hanesan, ba oin sei iha kria regulamentu ba Komisaun ba Asuntu Tasi nian, Regulamentu ba Diresaun AMN, Organizasaun Funsionamentu Divizaun Téknika Espesializada, Organizasaun Funsionamentu Sentru Operasaun Marítima, Regulamentu Jerál Kapitais Portu Delegasaun Marítima nian, Regulamentu Atividade Unidade Marítima ba Espasu Jurisdisaun.

Iha futuru AMN koloka mós ekipa konjunta halo servisu iha Portu Tibar halo kontrola ba Ataúro to’o Batugade to’o Oecusi no iha Portu Com halo kontrola to’o portu Mulia no Caravela, no iha Portu Covalima halo kontrola ba to’o Portu Beacu-Viqueuqe nian.

Iha parte seluk, Diretór PCIC, Vicente Fernandes e Brito  rekomenda ba Governu Timor-Leste tenke haree didi’ak Autoridade Marítima Nasionál nia iha rekursu no autonomia finanseiru rasik hodi bele jere no implementa servisu ho  independente.

Grupu traballu sira ne’ebé tama iha ekipa Autoridade Marítima Nasional no Órgaun Sistema Autoridade Marítima maka, Komponente Forsa Navál Ligeria F-FDTL, Unidade Polisia Marítima UPM-PNTL, Polisia Sientífika Investigasaun Kriminál (PCIC), Servisu Migrasaun, Diresaun Jerál Peska Agrikultura no Rekursu Mariños, Diresaun Jerál Autoridade Aduaneira/Alfándega, Diresaun Jerál Autoridade Tributária, Diresaun Jerál Transporte Komunikasaun, Diresaun Jerál Protesaun Saúde, Administrasaun Portu Timor-Leste (APORTIL,I.P), Diresaun Jerál Petróleu no Mina-rai, I.P, Diresaun Jerál Protesaun Sivíl, Ajénsia Investigasaun Fiskalizasaun Autoridade Ekonomia Sanitária no Alimentár (AIFAESA,I.P), Diresaun Jerál Ministériu Justisa, Diresaun Jerál Ministériu Finansas, Diresaun Jerál Meiu Ambiente no Diresaun Jerál Turizmu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here