Imajen/MAPKOMS

DILI, 05 novembru 2020 (TATOLI) – Ekipa futeból salaun (Futsal) feminina Timor Telecom (TT) simu derrota hosi nia adversáriu Gabinete Primeiru-Ministru (GPM) ho golu 0-3 liuhosi kontinuasaun torneiu  Futsal Ministeriu Asuntu Parlamentár no Komunikasaun Sosiál, ohin kalan, iha kampu multifunsaun Bebora, Dili.

Iha minutu primeira parte hahú ekipa Timor Telecom halo kontra atake maka’as hasoru ekipa GPM. Enkuantu ekipa GPM halo jogu ho kalma mantein rezisténsia no hodi estuda lala’ok ka maneira  jogu Timor Telecom nian.

Esforsu no kontra atake ne’ebé Timor Telecom haka’as hela de’it hanesan esforsu no tanba la rezulta golu ruma hodi bele kontribui vitoria ba Timor Telecom iha jogu ne’e.

Jogu ho kalma no nakonu ho rezisténsia ne’e lori  GPM “kombate” duni ekipa Timor Telecom liuhosi jogadora Clizia Exposto (9) ne’ebé fura golu rua tuituir malu hodi lori rezultadu ba 2-0 iha jogu primeira parte.

Hakat ba segunda parte ekipa rua halo jogu ne’ebé ho esforsu hanesan atu hatama tan golu. Maibé, ekipa Timor Telecom obrigadu la hetan ona oportunidade tanba ekipa GPM la fó oportunidade hodi jogadora Timor Telecom lansa sira nia suta.

Jogadora Nelita M. (7) hosi GPM termina kompletu derrota Timor Telecom nian bainhira nia kontribui prodús golu ida tan hodi “tonka”  score GPM nian ba 3-0.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here