Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

BOBONARO, 05 novembru 2020 (TATOLI)—Ministériu Turizmu, Komérsiu no Indústria (MTKI) iha ona planu iha tinan oin sei harii loja freska atubele asegura kualidade nutrisaun.

Tuir Ministru Turizmu, Komérsiu no Indústria, José Lucas do Carmo da Silva, loja ne’e sei akumula produtu hosi produtór ka agrikultór sira molok lori ba merkadu hodi fa’an.

“Loja freska ho naran seluk loja ba povu, atu kanaliza produtór ninia produtu ba fasilidade ne’ebé Governu hatuur ona, nune’e bele proteje produtu. Ita tau iha armajen no fa’an ba loja freska tanba ita hakarak mantein ninia kualidade,” Ministru tenik iha aldeia Palaka, munisípiu Bobonaro, kinta ne’e.

Governante ne’e dehan, presiza garante kualidade produtu hahú hosi natar laran to’o bazar.

“Ministeriu Turizmu, Komérsiu no Indústria ninia papél maka atu asegura kualidade tanba iha iha programa  VIII Governu konstitusionál 2021 mensiona oinsá atu hadi’a armajen ezistente iha área fronteira no halo jestaun di’ak,” nia akresenta.

Biban ne’e, nia louva serbisu agrikultór Atabae tanba bele halo produsaun di’ak hodi kolleta hare ba époka daruak iha tinan ne’e.

“Agrikultór Atabae hanesan ezemplu ida di’ak tebes,  maibé ita la para de’it iha ne’e. Tanba ne’e husu atu kontinua program ne’e atubele replika ba territóriu Timór tomak no bele asegura produtu lokál iha ita-nia rai laran ho di’ak,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here