Sekretáriu Estadu Terras no Propriedade, Mário Ximenes. Imajen Tatoli/Egas Cristovão

DILI, 05 novembru 2020 (TATOLI)-Hosi janeiru to’o outubru, tinan ne’e, Sekretária Estadu Terras no Propriedade (SETP) “halibur” reseita hamutuk  millaun $4.2 hodi kontribui ba kofre Estadu.

Sekretáriu Estadu Terras no Propriedade, Mário Ximenes, hateten, reseita sira-ne’e “halibur” hosi kontratu arrendamentu  ba patrimóniu movies no imoveis ne’ebé Estadu hala’o kontratu  ho arrendatáriu sira.

Nia dehan, rai no uma ka edifísiu públiku ne’ebé pertense ba Estadu ne’ebé Ministériu Justisa (MJ)  liuhosi Sekretária Estadu Terras no Propriedade (SETP)  administra halo kontratu ho ema individual, emprezáriu  no seluk hodi utiliza hela  ka hala’o atividade ruma.

“Iha kontratu  arrendatáriu 4025 iha territóriu sira selu depende kontratu ne’ebé hosi fulan janeiru to’o outubru, tinan ne’e, ita rekolla ona reseita hamutuk millaun  $4.2 hodi kontribui ba kofre Estadu,” Mário Ximenes, hateten ba Agência Tatoli, ohin, iha nia kna’ar fatin, Dili.

Durante mandatu, Sekretáriu Estadu, Mário Ximenes, hala’o kampaña informasaun no advokasia   hodi nune’e komunidade no emprezáriu sira  ne’ebé  utiliza movies no imoveis Estadu nian atu bele halo rejistu nune’e Estadu bele regulariza.

“Liu hosi  ne’e ita konsege rejistu tan arrendatáriu foun daudaun  hamutuk  5.000  ne’ebé mai ho voluntáriu rejista iha Terras no Propriedade sira kolabora hakarak atu selu arrendamentu,” Mário Ximenes hateten.

SETP sei halo hela prosesu identifikasaun ba arrendatáriu foun  hafoin halo kontratu hodi selu taxa ba Estadu.

Nia dehan, Terras Propriedade iha  poténsia boot  rekolla  reseita ne’ebé sei ho sustentavel tanba ne’e bainhira arrendatáriu hirak  selu hotu ona mak sei hasa’e liu tan taxa ba Estadu.

Nia husu komunidade ne’ebé uza patrimóniu Estadu hanesan rai no uma  seidauk rejistu atu bele ba rejistu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here