Vice-Ministru Administrasaun Estatal, Lino de Jesus Torezao. Imajen/Antonia Maia Gusmao

DILI, 05 novembru 2020 (TATOLI)—Vise-Ministru Administrasaun Estatál (MAE), Lino Torrezão, hateten Grupu Tékniku Interministerál (GTI) sei anunsia rezultadu ezame ba kandidadtu Prezidente Autoridade (PA) Munisípiu Baucau, Viqueque no Lospalos, iha fulan novembru nia rohan.

Notisia Relevante: 15 outubru, MAE sei realiza ezame ba Administradór Munisípiu Aileu-Ainaro-Covalima

“Iha fulan novembru ikus nian, ita fó sai ona Prezidente Autoridade ba iha públiku, nune’e bele hala’o ona knaar iha ida-idak nia administrasaun munisipál,” Vise-Ministru Administrasaun Estatál (MAE), Lino Torrezão, inform aba Agência TATOLI via telefónika, kuarta ne’e.

Governante ne’e mós informa, Grupu Tékniku Interministeriál (GTI) halo apresiasaun ba Prezidente Autoridade (PA) Munisípiu tolu (3) Baucau, Lautém no Viqueque, no ohin sei lori ninia rezultadu ba iha Konsellu Konstrutivu Munisipál.

“Ekipa Konsellu Konstrutivu Munisipál mak sei kria ekipa tolu, hodi bele kobre dala ida de’it ba munisípiu tolu (3). Hafoin apresiasaun ramata, MAE sei aprezenta dokumentu ba Komisaun Funsaun Públika (KFP) depois rezultadu MAE sei lori ba Konsellu Ministru (KM) mak deside, sé loos mak sei sai Prezidente Autoridade ba munisípiu tolu ne’e,” Lino Torrezão hateten.

Nia hatutan, oras ne’e daudaun, seidauk hatene loloos sé mak sei asume knaar hanesan Prezidente Autoridade ba Munisípiu Baucau, Lautém no Viqueque, maske rezultadu ezame hatudu katak númeru ida mak ho valór boot liu  maibé ne’e seidauk define loloos. Tanba ne’e, tuir nia, sei hein de’it rezultadu ikus hosi Konsellu Ministru, karik kandidatu númeru rua bele liu.

Kona-ba munisípiu rua seluk, hanesan Aileu no Ainaro, foin mak tama ba lista definitivu provizóriu no MAE hein laiha ema ida mak halo reklamasaun kona-ba apoiante ne’ebé tuir ezame.

“MAE sei kontinua prosesu hanesan ho munisípiu tolu parte leste ne’e,” nia esplika.

Iha parte seluk, kona-ba munisípiu Covalima, Vise-ministru ne’e hateten, horisehik foin halo koresaun hotu tanba ne’e seidauk bele fó sai rezultadu.

Notisia Relevante: MAE rejeita informasaun administradór munisipál hosi partidu

Jornalista: Osória Marques

Editór: Câncio Ximenes

HAKEREK NO HATÁN

Please enter your comment!
Please enter your name here